Medıtsınalyq uıymdar lıtsenzııany bes jyl saıyn jańartyp otyrady

ASTANA. KAZINFORM — DSM medıtsınalyq qyzmetti lıtsenzııalaýdyń bes jyldyq merzimin engizýdi qarastyryp jatyr, dep habarlaıdy Densaýlyq saqtaý mınıstrliginiń baspasóz qyzmeti.

Medıtsınalyq uıymdardyń qyzmetine memlekettik baqylaýdy kúsheıtý maqsatynda Densaýlyq saqtaý mınıstrligi qazirgi qoldanystaǵy merzimsiz lıtsenzııa berý praktıkasynyń ornyna medıtsınalyq qyzmetti lıtsenzııalaýdyń bes jyldyq merzimin kezeń-kezeńimen engizý múmkindigin qarastyryp jatyr.

— Bekitilgen 2026 jylǵa arnalǵan is-sharalar jospary sheńberinde belgilengen standarttarǵa sáıkestikti mindetti túrde qaıta baǵalaı otyryp, medıtsınalyq qyzmetke lıtsenzııanyń merzimsiz ornyna bes jyldyq qoldanylý merzimin engizý josparlanyp otyr. Shara kadrlyq áleýetti, materıaldyq-tehnıkalyq bazany jáne kórsetiletin qyzmetterdiń sapasyn turaqty baǵalaýǵa baǵyttalǵan, — delingen habarlamada.

Sonymen qatar, 2026 jylǵy qańtardan bastap densaýlyq saqtaý salasyndaǵy shaǵyn kásipkerlik sýbektilerin memlekettik tirkeýden ótkennen keıingi alǵashqy úsh jyl ishinde tekserýge tyıym salý normasy alynyp tastalady. Bul shara qadaǵalaý sharttaryn teńestirýge jáne medıtsınalyq uıymdar jumysynyń erte kezeńderinde júıeli buzýshylyqtardyń jınaqtalýyn boldyrmaýǵa múmkindik beredi.

Budan basqa, Prezıdenttiń tapsyrmasyn oryndaý sheńberinde Mınıstrlik qarjy monıtorıngi agenttigimen jáne basqa da ýákiletti organdarmen birlesip TMKKK jáne MÁMS sheńberinde qyzmet kórsetetin jeke medıtsınalyq uıymdardyń qyzmetine bıýdjet qarajatynyń maqsatty paıdalanylýyn baǵalaı otyryp, keshendi tekserý júrgizedi.

Búgingi tańda QR-da medıtsınalyq qyzmetke lıtsenzııasy bar 22 905 densaýlyq saqtaý sýbektisi, onyń ishinde 8 803 memlekettik medıtsınalyq uıym, 14102 jeke densaýlyq saqtaý sýbektisi tirkelgen. 

Osydan buryn medıtsınany qarjylandyrý kózderiniń málimetteri biriktiriletinin jazǵan edik.