Medıtsınalyq týrızmniń biryńǵaı marketpleısi engiziledi
ASTANA. KAZINFORM — Sheteldik emdelýshilerge arnalǵan mamandandyrylǵan jýrnal shyǵarylady. Bul týraly Quryltaı depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Medıtsınalyq týrızm salasyndaǵy Ulttyq operatordyń biryńǵaı tsıfrlyq platformasyn qurý aıasynda pakettik usynystardy ornalastyrý, kórsetiletin qyzmetterdi brondaý, týrısterdi tsıfrlyq súıemeldeý jáne memlekettik tsıfrlyq júıelermen ıntegratsııalaý múmkindikterin qarastyra otyryp, medıtsınalyq týrızmniń biryńǵaı marketpleısi formatyn engizý josparlanǵan, — dedi Úkimet basshysy.
Onyń aıtýynsha, elimizdiń densaýlyq saqtaý salasyndaǵy jetistikteri men medıtsınalyq týrızm múmkindikteri týraly aqparattyq-túsindirý jumysy uıymdastyrylǵan.
— Sheteldik týroperatorlar, saqtandyrý jáne medıtsınalyq kompanııalar úshin aqparattyq týrlardy uıymdastyrý, medıtsınalyq qyzmetter paketterin jarnamalaý, onyń ishinde sheteldik BAQ-ty tartý máseleleri pysyqtaldy. Áleýetti sheteldik emdelýshilerdi Qazaqstannyń medıtsınalyq uıymdary, onyń ishinde JCI halyqaralyq akkredıtatsııasy bar uıymdar men otandyq densaýlyq saqtaý júıesiniń múmkindikteri týraly habardar etýge baǵyttalǵan mamandandyrylǵan jýrnal daıyndaý isi qolǵa alyndy. Qazaqstannyń medıtsınalyq kórsetiletin qyzmetterin sheteldik naryqtarda ilgeriletý maqsatynda múddeli memlekettik organdarmen, «Kazakh Tourism» UK» AQ-men, týroperatorlarmen jáne medıtsınalyq uıymdarmen birlesken jumys jalǵasyp jatyr, — dedi Oljas Bektenov.
Aıta keteıik, elimizde emdelý quny Eýropa, Soltústik Amerıka, Ońtústik Koreıa jáne Parsy shyǵanaǵy elderine qaraǵanda aıtarlyqtaı tómen.
Sonymen qatar elimiz sheteldik patsıentterge arnalǵan medıtsınalyq týrpaketter ázirlendi.
