Medıtsınalyq tekserý: balalar arasynda as qorytý aýrýlary kóbeıgen

ASTANA. KAZINFORM — Mektep oqýshylaryn jyl saıyn medıtsınalyq tekserýden ótkizý qarastyrylǵan. Bul turǵyda balalar arasynda qaı aýrý túrleriniń kóbeıip bara jatqany baıqalyp otyr? Bul suraqqa QR Densaýlyq saqtaý mınıstrligi jaýap berdi. 

— Mektep oqýshylarynyń profılaktıkalyq medıtsınalyq qarap-tekserýleri «Mektepke deıingi, mektep jasyndaǵy balalardy, sondaı-aq tehnıkalyq jáne kásiptik, orta bilimnen keıingi jáne joǵary bilim berý uıymdarynyń bilim alýshylaryn qosa alǵanda, halyqtyń nysanaly toptaryna profılaktıkalyq medıtsınalyq qarap-tekserýlerdi júrgizý qaǵıdalaryn, kólemi men merzimdiligin bekitý týraly» QR Densaýlyq saqtaý mınıstriniń 2020 jylǵy 15 jeltoqsandaǵy buıryǵyna sáıkes júrgiziledi. Salıdat Qaıyrbekova atyndaǵy densaýlyq saqtaýdy damytýdyń ulttyq ǵylymı ortalyǵynyń jedel aqparatyna sáıkes, 2024 jyly profılaktıkalyq medıtsınalyq qarap-tekserýlermen jalpy 5 641 085 bala qamtylǵan, bul jyldyq jospardyń 92,1% qurady, — delingen mınıstrliktiń Kazinform agenttigine bergen jaýabynda.

Tekserý qorytyndysy boıynsha balalardyń 9,1 paıyzynda alǵash ret anyqtalǵan aýrýlar tirkeldi.

— Birinshi orynda as qorytý júıesiniń aýrýlary, ekinshi orynda — qan aýrýlary, úshinshi orynda tynys alý júıesiniń aýrýlary anyqtaldy, — dep atalyp ótken vedomstvo aqparatynda.

Budan buryn habarlanǵandaı, 2025 jyldyń birinshi jarty jyldyǵynyń qorytyndysy boıynsha jyldyq jospardaǵy balalardyń 52 paıyzy tekserildi.