Medıtsınalyq tehnıkany otandyq ónim retinde satqan kúdikti elge qaıtaryldy
ASTANA. KAZINFORM — Grýzııadan asa iri mólsherde alaıaqtyq jasaǵan jáne jalǵan medıtsınalyq buıymdardy ótkizgen kúdikti ekstradıtsııalandy.
Bas prokýratýra men Ulttyq qaýipsizdik komıtetiniń qyzmetkerleri Qazaqstannyń Grýzııadaǵy elshiliginiń qoldaýymen atalǵan elden asa iri mólsherde alaıaqtyq jasaǵany, sondaı-aq jalǵan medıtsınalyq buıymdardy iri mólsherde óndirgeni jáne ótkizgeni úshin qylmystyq jaýaptylyqqa tartý maqsatynda Qazaqstan azamatyn ekstradıtsııalady.
Tergeý barysynda kúdiktiniń memlekettik medıtsınalyq uıymdardyń medıtsınalyq jabdyqtardy satyp alý jónindegi tenderlerinde basymdylyqqa ıe bolý maqsatynda otandyq taýar óndirýshi mártebesin zańsyz alý shemasyn uıymdastyrǵany anyqtaldy.
— Atap aıtqanda, ol naqty óndiristi uıymdastyrmaı, medıtsınalyq tehnıkanyń Qazaqstanda óndiriletini týraly ýákiletti memlekettik organdarǵa jalǵan málimetter usynǵan.
Nátıjesinde sheteldik jınaqtaýshy bólshekterden qurastyrylǵan medıtsınalyq tehnıka memlekettik medıtsınalyq uıymdarǵa otandyq ónim retinde ótkizilip, memleketke 4,5 mlrd teńgeden astam zalal keltirilgen, — delingen habarlamada.
Qylmystardy jasaǵannan keıin kúdikti qylmystyq qýdalaý organdarynan jasyrynyp, osyǵan baılanysty halyqaralyq izdeýge jarııalanǵan.
Aǵymdaǵy jyldyń naýryz aıynda ol Grýzııa aýmaǵynda ustalyp, Bas prokýratýranyń suraý salýy boıynsha Qazaqstanǵa ekstradıtsııalandy.
Qazirgi ýaqytta kúdikti tergeý ızolıatoryna qamaýǵa alyndy.
Oǵan taǵylǵan qylmystardy jasaǵany úshin múlki tárkilenip, on jylǵa deıingi merzimge bas bostandyǵynan aıyrý jazasy kózdelgen.
Eske sala keteıik, jyl basynan beri Grýzııadan 7 adam ekstradıtsııalandy, olardyń 5-i jymqyrý úshin izdeýde bolǵan.
Aıta ketelik Reseıden Qazaqstanǵa esirtki zerthanalaryn uıymdastyrǵan kúdikti ekstradıtsııalanǵan edi.
