Medıtsınalyq saqtandyrý júıesine memlekettik aýdıt júrgizildi
ASTANA. KAZINFORM – Áleýmettik medıtsınalyq saqtandyrý qorynyń ınvestıtsııalyq tabysy ósti. Bul týraly Májiliste MÁMS júıesin odan ári jetildirý taqyrybyna arnalǵan Úkimet saǵatynda Joǵary aýdıtorlyq palatanyń múshesi Nurlan Nurjanov málim etti.
- 2024 jyly Joǵary aýdıtorlyq palata Áleýmettik medıtsınalyq saqtandyrý qory jáne onyń óńirlik fılıaldary qyzmetiniń tıimdiligine memlekettik aýdıt júrgizdi. Birinshiden, 2024 jylǵy 1 qańtardaǵy jaǵdaı boıynsha medıtsınalyq saqtandyrý júıesinde 16,2 mln adam nemese jalpy halyqtyń 81 paıyzy saqtandyrylǵan. Qarjylyq júktemesin memleket kóteretin saqtandyrylǵandar qataryna 15 jeńildikti sanatqa kiretin 12 mln adam jatatynyn atap ótken jón. 2 mln-di quraıtyn memlekettik qyzmetshini, bıýdjettik uıymdardyń jumyskerlerin jáne kvazımemlekettik sektor qyzmetkerlerin eskere otyryp, memleket 14 mln nemese 86% saqtandyrylǵan adamnyń qarjylyq júktemesin kóteredi, - dedi N. Nurjanov.
Onyń aıtýynsha, densaýlyq saqtaý júıesindegi medıtsınalyq shyǵystar bólinisinde Tegin kepildendirilgen medıtsınalyq kómek jáne Medıtsınalyq saqtandyrýdy eskere otyryp, respýblıkalyq bıýdjettiń shyǵystary 2022 jyldyń qorytyndysy boıynsha 1,7 trln teńgeni nemese barlyq shyǵyndardyń 78%-yn, al 2023 jyldyń qorytyndysynda 2 trln teńgeni nemese 76%-dy qurady.
- Bul jerde, mindetti áleýmettik medıtsınalyq kómek júıesiniń negizgi mindetteriniń biri ulttyq densaýlyq saqtaý júıesiniń jumys isteý tıimdiligin arttyrý úshin memlekettiń, jumys berýshiniń jáne azamattyń ortaq jaýapkershiligin engizý bolǵandyǵyn aıta ketken jón. Ekinshiden, aýdıt qorytyndylary Qor aktıvteriniń údemeli ósýin kórsetip otyr. 2022 jyly aktıvterdiń túsimi 1,2 trln teńgeni qurasa, 960 mlrd teńgesi paıdalanyldy. 2023 jyly aktıvterdiń túsimi 1,4 trln teńgege deıin ulǵaıyp, onyń 1 trln teńgesi paıdalanyldy. Qordyń ınvestıtsııalyq tabysy 2022 jylǵy 66,7 mlrd teńgeden, 2023 jyly 113,4 mlrd teńgege deıin ósti, komıssııalyq syıaqysynyń da údemeli ósýi baıqaldy. Alaıda Qordyń qoldanystaǵy Qarjy modeliniń boljamyna sáıkes, taıaýdaǵy 5 jylda Medıtsınalyq saqtandyrý júıesiniń aǵymdaǵy damýy onyń turaqsyzdyǵyna ákep soǵady dep qarastyrylýda, - dedi aýdıtorlyq patata múshesi.
Buǵan deıin Májilis tóraǵasynyń orynbasary Danııa Espaeva densaýlyq saqtaýǵa shyǵystardyń aıtarlyqtaı ulǵaıǵanyna qaramastan, adamdardyń medıtsınalyq qyzmetterdiń kórsetilýine qanaǵattaný deńgeıi tómendep bara jatqanyn aıtty.