Medıtsınalyq saqtandyrý týraly jańa zańda qandaı ózgerister bolady

ASTANA. KAZINFORM – Densaýlyq saqtaý mınıstri Aqmaral Álnazarova medıtsınalyq saqtandyrýǵa qatysty jańa zańnamada qandaı ózgerister bolatynyn aıtyp berdi.

− 2026 jyldan bastap saqtandyrý júıesine jergilikti bıýdjet qarajaty esebinen 1 mln-nan astam azamatty tartýǵa múmkindik beretin Zań jobasy ázirlendi (halyqtyń áleýmettik osal toby, tabysy tómen adamdar). Bul azamattardyń qalta shyǵyndaryn edáýir tómendetýge jáne olardy qarjylyq qorǵalýyn qamtamasyz etýge baǵyttalǵan, - dedi A. Álnazarova Májilistegi Úkimet saǵatynda.

Mınıstrdiń aıtýynsha, qyzmetterdiń qaıtalanýyn boldyrmaý, azamattardyń áleýmettik mártebesin esepke alý jáne saqtandyrý mártebesine qaramastan bazalyq kómekke kepildik berý úshin biryńǵaı paketter qalyptastyrý kózdelip otyr.

2026 jyldan bastap negizgi mindettemelerdi tegin medıtsınalyq kómek kólemi paketinen saqtandyrý júıesine aýystyryp, kezeń-kezeńimen biriktirý josparlanýda.

− Tegin medıtsınalyq kómek kólemi paketinde áleýmettik mańyzy bar aýrýlarǵa kúdik jaǵdaıyndaǵy kómek 2-den 8-ge deıin ulǵaıtylyp, saqtandyrý mártebesine qaramastan tegin kórsetiletin bolady. Odan bólek, bıyldan bastap saqtandyrylmaǵan azamattardyń onkoskrınıngten tegin ótýge múmkindigi bar. Bıyldan bastap skrınıngtiń jańa 2 túri engizildi – júktilikke daıyndyq jáne 50 jastan asqan erlerde ınsýlt pen ınfarktty aldyn alý, - dedi Densaýlyq saqtaý mınıstri.

Zań jobasyn aqpan aıynyń sońynda Parlamentke engizý josparlanýda.

Búgin Májilis tóraǵasynyń orynbasary Danııa Espaeva Úkimet saǵatynda adamdardyń medıtsınalyq qyzmetterdiń kórsetilýine qanaǵattaný deńgeıi tómendegenin, MÁMS-ke qatysty berilgen naqty usynystar oryndalmaı otyrǵanyn aıtqan edi.

Óz baıandamasynda mınıstr Qazaqstanda ólim azaıǵanyn, ómir súrý uzaqtyǵy artyp, salany qarjylandyrý kólemi artqanyn aıtýda.