Medıtsınalyq saqtandyrý qorynyń burynǵy basshysy nege jaýapqa tartylmaıdy – depýtat

ASTANA. KAZINFORM — Májilis depýtaty Murat Ábenov Mindetti medıtsınalyq saqtandyrý qorynyń burynǵy basshysyn jemqorlyqqa jol ashatyn sheshimder qabyldaǵany úshin jaýapqa tartýdy usyndy.

— Depýtat B.Bazarbek jaqynda eki derekti keltirdi. Astanadaǵy bir emhana ózi kórsete almaıtyn qyzmet aqysyna dep 190 mln teńge alsa, ekinshi emhana 218 mln teńge alǵan. Ol úshin atalǵan kásiporyndarǵa «jeńil zańsyzdyq» sharasy qabyldanǵan. Al alǵan aqshasyn áli qaıtarmaǵan, ózderinde. 

Bireý zań buzsa, aqshasyn qaıtaryp beredi, ekinshileri qaıtarmaıdy. Bul qalaı? Basqa salada mundaı áreketter urlyq, qylmys bolyp esepteledi. Nelikten osyndaı faktilerge jol bergender áli qamaýǵa alynbaǵan, emhanalar nege áli qyzmet kórsetip otyr? Al sony ashyp aıtqan depýtatqa qoǵamdyq qysym jasalady.

Aktilerge qol qoıǵan qordyń burynǵy basshysy jaı ǵana qyzmetinen ketti. Nege jaýapqa tartylmaıdy? Ne istemeksiz, — dep surady depýtat Májilistiń jalpy otyrysynda.
Densaýlyq saqtaý mınıstri Aqmaral Álnazarova Joǵary aýdıtorlyq qorynyń qorytyndysynda kórsetilgen kmeshilikter birdindep joıylyp jatqanyn málim etti.

— Joǵary aýdıtorlyq palatanyń usynymdaryna kelsek, negizsiz bólingen qarajatty óteý kestesi qoıyldy. Uıymdar tarapynan qarajat ishinara óteledi. Aýdıtorlyq palata usynymy boıynsha 1390 medıtsınalyq uıymnyń jumysyna monıtorıng júrgizildi. Onyń ishinde medıtsınalyq baqylaý komıtetine zańsyzdyq anyqtalǵan 160-qa jýyq uıymnyń ústinen lıtsenzııasyn qaıtaryp alý sııaqty sharalar qabyldaý úshin joldandy, — dedi vedomstvo basshysy.

Buǵan deıin taǵy bir Májilis depýtaty Ashat Aımaǵambetov byltyr eldiń densaýlyq saqtaý júıesi memleketten shamamen 500 mlrd teńge kem alǵanyn málim etken edi.