Medıtsınalyq saqtandyrý qorynan orasan zor qarajat urlanyp jatyr — Toqaev

QYZYLORDA. KAZINFORM — Memleket basshysy Qasym-Jomart Toqaev V Ulttyq quryltaıda eldegi alaıaqtyqtyń órshýine memlekettik organdar da «úles qosyp» jatqanyn aıtty.

- Alaıaqtar ulttyq qaýipsizdikke naqty qater tóndiretin qaýipke aınaldy. Medıtsınalyq saqtandyrý qorynan orasan zor qarajat urlanyp jatyr. Sonymen birge jedel járdem qyzmetiniń ókilderi, feldsherler alaıaqtardyń úndeýine senip, narazylyq aktsııalaryna shyǵyp, áleýmettik talaptar qoıyp júr. Azamattarymyz alaıaqtarǵa jem bolyp, adal jolmen jınaǵan qarajatyn joǵaltyp jatyr, aldaýǵa kónip qylmysty qarjylyq operatsııalarǵa tartylyp júr.

Qazir álemde kóshi-qon salasyndaǵy alaıaqtyq problemasy aıtarlyqtaı shıelenise tústi. Eýropa men AQSh-ta ne bolyp jatqanyn kórip otyrsyzdar. Sheteldikter úshin elimiz jumys tabý, turmys deńgeıi turǵysynan tartymdy bola bastaǵandyqtan bul másele bizdiń elimizde de erekshe ózekti bolyp tur. Quqyq qorǵaý organdary Qazaqstan aýmaǵynda turaqty turǵysy kelgen sheteldikterge qujattardy zańsyz berýmen aınalysqan alaıaqtardyń qylmystyq áreketin áshkereledi, - dedi Qasym-Jomart Toqaev.

Memleket basshysy alaıaqtyq qylmysqa qarsy kúresti kúsheıtý qajettigin atap ótti.

- Zań men tártip buzýshylardyń bárin - usaq buzaqylardan, urylardan bastap uıymdasqan qylmystyq top ókilderine deıin, qoǵamdy turaqsyzdandyrýdy kózdeıtin arandatýshylardy jaýapkershilikke tartý kerek. Bul ózekti jáne birinshi kezektegi mindet dep aıtýǵa bolady. Tsıfrlandyrý sózsiz barlyq jerdi qamtıdy jáne tutas sıpatta júredi. Bul jeke derekterdi zańmen qorǵaýǵa, azamattardyń qarjylyq jáne tsıfrlyq saýattylyǵyn arttyrýǵa nazar aýdarý kerek degendi bildiredi, - dedi Prezıdent.

Aıta keteıik, Kazinform Memleket basshysynyń Ulttyq quryltaıdaǵy sózin translıatsııalap jatyr.