Medıtsınalyq saqtandyrý qory mindettemesin oryndaı ala ma
ASTANA. KAZINFORM – Áleýmettik medıtsınalyq saqtandyrý qorynyń qarjylyq modelinde birqatar kemshilik anyqtaldy. Bul týraly Májiliste MÁMS júıesin odan ári jetildirý taqyrybyna arnalǵan Úkimet saǵatynda Joǵary aýdıtorlyq palatanyń múshesi Nurlan Nurjanov málim etti.
- Qordyń boljamdy túsimderi men shyǵystaryna sáıkes, 2026 jylǵa qaraı jyl saıynǵy shyǵystary túsimderden asyp túsip, Qor 2031 jyldan bastap mindettemelerin oryndaı almaıdy dep eseptelip otyr. Óz kezeginde júrgizilgen aýdıttiń nátıjesi Qordyń jasaǵan qarjylyq modelinde birqatar kemshilik bar ekendigin kórsetti. Atap aıtsaq, Qor reglamentine qaıshy keletin qarjylyq modeliniń túsimderin qalyptastyrý kezinde demografııalyq boljamnyń ornyna halyqtyń ortasha ósimi qoldanylǵany anyqtaldy, sondaı-aq ınvestıtsııalyq tabysty esepteý kezinde qarjy quraldary boıynsha syıaqynyń ortasha mólsheri 13,5%-dyń ornyna 11%-ǵa deıin tómendetilip eseptelgen. Shyǵystardyń boljamyna keletin bolsaq, Medıtsınalyq saqtandyrý júıesine qatysy joq, Tegin kepildendirilgen medıtsınalyq kómek esebinen qarjylandyrylatyn shyǵystardy qarastyratyn kórsetkishterdi, naqty oryndalǵan shyǵystardyń ornyna josparly mánderdi, sondaı-aq medıtsınalyq qyzmetterge arnalǵan shyǵystardy qarjylandyrýǵa paıdalanylmaıtyn rezervterdi qarastyrýǵa qatysty kemshilikter anyqtaldy. Osylaısha, aýdıt 2022-2023 jyldarǵa arnalǵan qarjy modeliniń kiris jáne shyǵys bóligi jalpy kólemi 351 mlrd teńgege durys qalyptastyrylmaǵanyn anyqtady, - dedi N. Nurjanov.
Onyń aıtýynsha, júrgiziletin aktýarlyq esepteýlerdiń obektıvtiligin qamtamasyz etý maqsatynda, Qorda Medıtsınalyq saqtandyrý júıesiniń qarjylyq turaqtylyǵyna táýelsiz aktýarlyq baǵalaý júrgizý kózdelmegen.
- Óz kezeginde Qarjylyq modeldiń nátıjeleri Medıtsınalyq saqtandyrý júıesin jetildirý boıynsha usynystar ázirleýge negiz bolatyndyǵyn aıta ketkenimiz jón. Sonymen qatar aýdıt Densaýlyq saqtaý mınıstrliginiń Medıtsınalyq saqtandyrý júıesi úshin aktýarlyq esepti qalyptastyrýdy retteıtin normatıvtik qujatty ázirleý ári bekitý boıynsha quzyreti qarastyrylmaǵanyn kórsetti. Osyǵan baılanysty Joǵary aýdıtorlyq palata tarapynan Úkimetke tıisti usynys berildi, - dedi aýdıtorlyq patata múshesi.
Budan buryn habarlanǵandaı, 2024 jyly Joǵary aýdıtorlyq palata Áleýmettik medıtsınalyq saqtandyrý qory jáne onyń óńirlik fılıaldary qyzmetiniń tıimdiligine memlekettik aýdıt júrgizdi.