Medıtsınalyq pýnkt salý úshin aýylda neshe turǵyn bolý kerek

ASTANA. KAZINFORM — Densaýlyq saqtaý mınıstriniń orynbasary Tımýr Muratov ortalyq kommýnıkatsııalar qyzmetinde ótken baspasóz máslıhatynda aýyldarǵa medıtsınalyq mekeme salýdyń demografııalyq normatıvterin atady.

— Densaýlyq saqtaý mınıstrligi qandaı da bir eldi mekende medıtsınalyq nysandy salar kezde tıisti normatıvke súıenip sheshim qabyldaıdy. Odan keıin jergilikti ákimdikterdiń pikirin eskeremiz. Normatıvte onyń bári qarastyrylǵan. 500 adamǵa deıin turǵyny bar aýyldarda medıtsınalyq pýnkt, 1500 adamǵa deıin halyq turatyn jerde feldsherlik-akýsherlik pýnkt, 1500-den artyq bolsa, dárigerlik ambýlatorııa bolý kerek. Úsh obektiniń kólemderi de, ishindegi atqaratyn qyzmetteri de ár túrli, — dedi ol.

Vıtse-mınıstr «Aýylda densaýlyq saqtaýdy jańǵyrtý» ulttyq jobasyna jabylýǵa shaq qalǵan aýyldar kirmegenin de atap ótti.

— Jabylýǵa shaq turǵan aýyldarǵa medıtsınalyq mekeme salyp jatqan joqpyz. Ulttyq jobany iske asyrar aldynda qaı eldi mekenderge medıtsınalyq mekeme salý kerektigin tolyǵymen anyqtap alǵanbyz, — dedi Tımýr Muratov.

Buǵan deıin qaıtarylǵan aktıvter qorynan 5,6 mlrd teńge Abaı oblysynda medıtsınalyq nysandar salýǵa jumsalatynyn jazǵan edik.