Medıtsınalyq mekemelerde dári-dármek tapshylyǵy múldem bolmaýy kerek - Premer-mınıstr

ASTANA. KAZINFORM – 2025 jylǵa arnalǵan dári-dármekti jetkizý rásimderi bıyldyń sońyna deıin aıaqtaý kerek. Bul týraly Úkimet otyrysynda Premer-mınıstr Oljas Bektenov málim etti.

«Prezıdent ult densaýlyǵyn nyǵaıtý úshin keshendi sharalardy iske asyrýdy tapsyrdy. Bul oraıda halyqty dári-dármekpen qamtamasyz etý asa mańyzdy másele sanalady. Memleket medıtsınalyq kómek kórsetý kezinde jáne esepte turǵandarǵa dárilik zattardy tegin beredi. Bul maqsatqa bıyldyń ózinde bıýdjetten shamamen 500 mlrd teńge bólindi. Dári-dármekpen úzdiksiz qamtamasyz etý jáne olardy aldyn ala satyp alý - eń basty mindetterdiń biri. Aýrýhanalar men emhanalar úshin 2025 jylǵa arnalǵan dári-dármekterdi satyp alý men jetkizý rásimderiniń barlyǵyn osy jyldyń sońyna deıin aıaqtaý qajet», - dedi O. Bektenov.

Bul turǵyda Úkimet basshysy medıtsınalyq mekemelerde dári-dármek tapshylyǵy degen múldem bolmaýy kerek ekenin qadap aıtty. 

«Buǵan Densaýlyq saqtaý mınıstri men SQ-Farmatsııa basshysy tikeleı jaýap beredi. Jalpy, dári-dármek naryǵyn jekemenshik óndirýshiler, jetkizýshiler jáne dárihana jelileri qalyptastyrady. Bul bıznesti memleket preparattardyń qaýipsizdigi, sapasy jáne olardy tirkeý turǵysynan ǵana retteıdi. Jýyrda dárilik zattardy tańbalaý men qadaǵalaýdy engizý aıaqtaldy. Ol dári-dármektiń óndirýshiden emdelýshige deıingi qozǵalysyn shtrıh-kod arqyly qadaǵalap otyrýǵa múmkindik berdi. Buryn jetkizý tizbegin baqylaı almaıtynbyz. Dárihanalarǵa kontrafaktilik jáne sapasyz preparattardyń túsý qaýpi de bar edi. Endi biz aýrýhanalar men emhanalardaǵy dárilik zattardyń qozǵalysyn emin-erkin kórip otyratyn bolamyz. Bul tegin preparattardyń zańsyz aınalymyna jol bermeıdi. ıAǵnı, osy máselede tártip ornatyldy», - dedi Premer-mınıstr.

Budan buryn habarlanǵandaı, 2024 jyldyń 1 shildesinen bastap elimizde dárilik zattardy tańbalaý men qadaǵalaý engizildi.