Medıtsınalyq mamandyqtarǵa aqyly negizde oqýǵa qabyldaý birtindep qysqartylady
ASTANA. KAZINFORM – Medıtsınalyq mamandyqtarǵa aqyly negizde oqýǵa qabyldaý birtindep qysqartylady. Bul týraly Densaýlyq saqtaý birinshi vıtse-mınıstri Tımýr Sultanǵazıev aıtty.
- Densaýlyq saqtaý mınıstrligi jyl saıyn medıtsınalyq bilim berýdiń barlyq deńgeıi boıynsha memlekettik bilim berý tapsyrysyn ornalastyrady. 2025 jyly 5000-nan astam bilim berý granttary bólindi. 2023 jyldan bastap memlekettik bilim berý tapsyrysy medıtsınalyq kadrlarǵa ózekti qajettilikterin negizge ala otyryp, eldiń naqty óńirlerine baılanysty qalyptastyrylady. Memlekettik grant esebinen bilim alatyn túlekter tapsyrys berilgen aımaqta eńbek praktıkasynan jáne pysyqtaýdan ótýge mindetti. Bul model jergilikti densaýlyq saqtaý júıesindegi kadr tapshylyǵyn dálirek jáne tıimdi toltyrýǵa múmkindik beredi. 2025 jyly rezıdentýranyń barlyq 2500 granty óńirlerdiń ótinimderi men qajettilikterin eskere otyryp bólindi. Bul bolashaq mamandardyń oqýdan ótýin jáne bolashaqta olardyń bilimi men daǵdylary eń suranysqa ıe jerde jumys isteýin qamtamasyz etedi, - dedi ol Ortalyq kommýnıkatsııalar qyzmetindegi brıfıngte.
Onyń atap ótýinshe, medıtsınalyq bilim sapasyn jaqsartý úshin aqyly negizde oqýǵa qabyldaýdy birtindep qysqartyp, bilim granty qunyn arttyrý josparlanyp otyr.
- Mınıstrlik ınternatýranyń jekelegen baǵdarlamalaryn engizý tetigin pysyqtap jatyr. Onyń sońynda túlekter aýyldyq eldi mekenderde jáne ambýlatorııalyq-emhanalyq mekemelerde jumys isteýge jiberiletin bolady. Bul jergilikti jerlerde kadrlardy turaqty tolyqtyrýdy jáne óńirlerde medıtsınalyq kómektiń qoljetimdiligin qamtamasyz etedi. Óńirlerde arnaıy balalar mamandarynyń tapshylyǵyna baılanysty rezıdentýra baǵdarlamalaryna qosymsha balalar beıinindegi 14 jańa mamandyq engiziledi, - dedi Tımýr Sultanǵazıev.
Aıta keteıik, Densaýlyq saqtaý mınıstrligi Іshki ister mınıstrligimen birge medıtsına uıymdarynda qoǵamdyq tártipti saqtaý, qyzmettik mindetin atqaryp júrgen medıtsına qyzmetkerlerine kúsh kórsetý men agressııany boldyrmaý úshin qaýipsizdikti qamtamasyz etýge baǵyttalǵan ortaq tujyrymdama ázirleıdi.