«Medıtsınalyq kómekti alysqa barmaı, aýyldan alamyz»: BQO-da kezekti dárigerlik ambýlatorııa ashyldy
ORAL. KAZINFORM – Memleket basshysy Qasym-Jomart Toqaevtyń tapsyrmasyna sáıkes, 2023 jyldan bastap iske qosylǵan «Aýylda densaýlyq saqtaýdy jańǵyrtý» ulttyq jobasy sheńberinde Jańaqala aýdany, Masteksaı aýylynda dárigerlik ambýlatorııa qoldanysqa berildi.
Jalpy aýdany 449 sharshy metr bolatyn medıtsınalyq nysanda táýligine 35 adam tıisti em-shara protsedýralaryn ala alady. Ǵımaratta qabyldaý bólmesi, fızıoterapııa bólmesi, LFK, emdeý bólmesi, vaktsınatsııa kabıneti, jeke qorǵanys quraldaryn aýystyrýǵa arnalǵan bólmeler, ızolıatsııalyq palata, akýsherler kabıneti jáne dárihana ornalasqan. Dárigerlik ambýlatorııa zamanaýı medıtsınalyq quraldarmen jabdyqtalǵan.
Medıtsına nysanynyń ashylýyna oblys ákimi Narıman Tóreǵalıev qatysyp, aýyl turǵyndaryn quttyqtady.
- Memleket basshysynyń tapsyrmasyna sáıkes aýyldarymyzdy damytýǵa barynsha mán berilýde. «Aýylda densaýlyq saqtaýdy jańǵyrtý» ulttyq jobasy aıasynda oblysymyzda 2023 jyldan beri 36 nysan iske qosyldy. Bunyń bári – birinshi kezekte turǵyndarymyzdyń ál-aýqatyn arttyrý jáne qyzmet kórsetý sapasyn jaqsartý baǵytynda atqarylyp otyrǵan jumystar, – dep atap ótti BQO ákimi Narıman Tóreǵalıev.
Aýyl turǵyndary óz kezeginde memleket tarapynan jasalyp otyrǵan jumystar úshin alǵystaryn bildirdi.
- Aýylymyzda zaman talabyna saı qural-jabdyqtarmen qamtamasyz etilgen dárigerlik ambýlatorııanyń ashylǵanyna qýanyshtymyz. Endi medıtsınalyq kómekti alysqa barmaı, aýyldan alamyz. Bul Prezıdentimizdiń aýyl turǵyndaryna, qarapaıym halyqqa barynsha kórsetip otyrǵan qoldaýy, – dedi densaýlyq salasynyń ardageri Raısa Dúısenǵalıeva.
Dárigerlik ambýlatorııa halyqtyń densaýlyǵyn jaqsartyp, sapaly medıtsınalyq kómek kórsetý úshin qoldaý bolmaq.
