Medıtsınalyq kómekke aqy tóleýdiń biryńǵaı júıesi qashan iske qosylady
ASTANA. KAZINFORM – Májiliste MÁMS júıesin odan ári jetildirý taqyrybyna arnalǵan Úkimet saǵatynda Joǵary aýdıtorlyq palatanyń múshesi Nurlan Nurjanov Áleýmettik medıtsınalyq saqtandyrý qoryndaǵy monıtorıntegi kemshilikti atady.
- Aýdıt qorytyndysy boıynsha Qor tarapynan medıtsınalyq qyzmetterdiń sapasy men kólemine qatysty monıtorıng tıisti deńgeıde júrgizilmeıtindigi anyqtaldy, - dedi N. Nurjanov.
Máselen, Astana qalasyndaǵy eki negizgi medıtsınalyq qyzmet kórsetýshi - «Salaýatty Astana» jáne «Shıpager» medıtsınalyq uıymdardyń teńgeriminde ǵımaraty men medıtsınalyq jabdyqtardyń joqtyǵy;
- medıtsınalyq uıymdarda tıisti medıtsınalyq qyzmet kórsetýge qatysty lıtsenzııalarynyń bolmaýy;
- densaýlyq saqtaý obektilerine qoıylatyn sanıtarııalyq-epıdemıologııalyq talaptardyń buzylýy;
- qormen shart jasasý kezinde kúndizgi statsıonardyń tósek qoryn málimdelgennen asyryp kórsetýi;
- medıtsınalyq uıymǵa 2 myńnan astam múgedektiń tirkelgendigine qaramastan, olarǵa tıisti jaǵdaılar jasamaý jáne taǵy basqa da faktileri anyqtaldy.
- Qor Medıtsınalyq qyzmet kórsetýshilerden qyzmetterdi satyp alý kezinde Densaýlyq saqtaý mınıstriniń buıryǵymen bekitilgen erejelerdi basshylyqqa alady. Erejege sáıkes, ónim berýshi Tegin kepildendirilgen medıtsınalyq kómek jáne Medıtsınalyq saqtandyrý aıasynda usynylatyn medıtsınalyq kómek túrleri boıynsha halyqqa aqyly negizde qyzmetter kórsetpeý týraly mindetteme alady. Alaıda Qor ónim berýshiniń osy qabyldaǵan mindettemeleriniń oryndalýyna monıtorıng júrgizilmeıtindigi anyqtalyp otyr. Óz kezeginde, Densaýlyq saqtaý mınıstrliginiń aqparaty boıynsha barlyq málimet Respýblıkalyq elektrondyq densaýlyq saqtaý ortalyǵy basqaratyn biryńǵaı tólem júıesine aǵylyp keletindikten, oǵan Qor qol jetkizip, aqyly qyzmetterge monıtorıng júrgize alady dep kórsetip otyr, - dedi aýdıtorlyq palata múshesi.
Onyń sózine qaraǵanda, aýdıt kezinde Biryńǵaı tólem júıesiniń derekteriniń «Aqyly qyzmetter», «Medıtsınalyq saqtandyrý jáne Tegin kepildendirilgen medıtsınalyq kómek esebinen tóleý» sanattary boıynsha derbes salystyrmaly tekserý júrgizildi. Nátıjesinde, azamattarǵa aqyly qyzmetter esebinen de, Tegin kepildendirilgen medıtsınalyq kómek jáne Medıtsınalyq saqtandyrý qarajaty esebinen de, ıaǵnı eki kózden 10 myńnan astam qyzmet kórsetilip, 4,2 mlrd teńge somasynda qarjy jumsalyp, sáıkessizdik oryn alǵan.
Sondaı-aq medıtsınalyq qyzmetterdi birlesip oryndaýshylarmen ıntegratsııalanǵan jáne ashyq aqparattyq júıeniń bolmaýy saldarynan 28 mlrd teńgege 56 mln-ǵa jýyq kórsetilgen medıtsınalyq qyzmetterdiń rastalmaǵany anyqtaldy.
- Bul rette, «2023 jylǵa arnalǵan Medıtsınalyq saqtandyrý júıesin jetildirý jónindegi Jol kartasynda» kózdelgen «e-Densaulyq arhıtektýrasynda medıtsınalyq kómekke aqy tóleýdiń biryńǵaı júıesin» (MKBJ) engizý jónindegi is-sharalar iske asyrylmaǵan. Onyń merzimi birneshe ret uzartylyp, Densaýlyq saqtaý mınıstrliginiń aqparatyna sáıkes 2025 jyldyń birinshi toqsanynda ǵana tórt óńirde «Kelisimshart», «Monıtorıng», «Tólem» modýlderin pılottyq rejıminde júrgizý qarastyrylyp otyr. Osylaısha, aýdıt nátıjeleri boıynsha anyqtalǵan faktiler, ákelgen yqtımal shyǵyndar men jiberip alǵan paıda kólemi 34 mlrd teńgeni qurady. Osyǵan baılanysty atalǵan materıaldar Bas prokýratýraǵa protsessýaldyq sheshim qabyldaý úshin jiberildi, - dedi Nurlan Nurjanov.
Budan buryn habarlanǵandaı, 2024 jyly Joǵary aýdıtorlyq palata Áleýmettik medıtsınalyq saqtandyrý qory jáne onyń óńirlik fılıaldary qyzmetiniń tıimdiligine memlekettik aýdıt júrgizdi.
Áleýmettik medıtsınalyq saqtandyrý qorynyń qarjylyq modelinde birqatar kemshilik anyqtaldy.