Medıtsınalyq qyzmetter jarnamasyna talap qatańdaıdy
ASTANA. KAZINFORM — Densaýlyq saqtaý mınıstrligi kórsetiletin medıtsınalyq qyzmetterdiń jarnamasyn júzege asyrý qaǵıdalaryna ózgertýler engizbek.
Atalǵan vedomstvo basshysynyń osyǵan oraı ázirlengen buıryq jobasy ashyq normatıvtik-quqyqtyq aktiler portalynda jarııalandy.
— Jańa normalar jarnamany azamattar úshin túsinikti, adal ári ashyq etýge baǵyttaǵan. Bul rette qujat patsıentter úshin eshqandaı jańa tyıym engizbeıdi. Buıryq jobasy qoldanystaǵy qaǵıdalardy Qazaqstan Respýblıkasynyń qoldanystaǵy zańnamasyna, onyń ishinde «Jarnama týraly», «Onlaın-platformalar jáne onlaın-jarnama týraly» zańdarǵa sáıkestendirý maqsatynda ázirlendi, — delingen qujat jobasynda.
Usynylyp otyrǵan ózgerister mynalardy kózdeıdi:
— jarnamanyń shynaıylyq,
— adaldyq jáne etıkalyq qaǵıdattaryn mindetti túrde saqtaý;
— ınternettegi jarnamalyq materıaldardy naqty belgileý;
— medıtsınalyq qyzmetterdiń jarnamasynda qamtylýy tıis aqparatqa qoıylatyn talaptardy naqtylaý, onyń ishinde medıtsınalyq uıymnyń lıtsenzııasy týraly málimetterdi kórsetý jáne dárigerdiń keńesine júginý jónindegi usynymdy engizý;
— qoldanystaǵy zańnamaǵa sáıkes termınologııany jańartý;
— múmkindigi shekteýli adamdar úshin onlaın-jarnamanyń qoljetimdiligin qamtamasyz etýge qoıylatyn talaptardy belgileý;
— jarnamalyq materıaldardy saqtaý merzimderin aıqyndaý.
Mınıstrliktiń atap ótýinshe, qujatty qabyldaý densaýlyq saqtaý salasyndaǵy jarnamalyq qyzmettiń ashyqtyǵyn arttyrýǵa, azamattardyń medıtsınalyq qyzmetter týraly aqparatqa degen senimin nyǵaıtýǵa jáne qoldanystaǵy qaǵıdalardy qazirgi tsıfrlyq talaptarǵa sáıkestendirýge múmkindik beredi.
Aıta keteıik, elimizde medıtsınalyq týrısterge arnalǵan «bir tereze» júıesi engiziledi.
