Medıtsınalyq qyzmet sapasyn arttyrý: Úkimet 2026-2030 jyldarǵa arnalǵan jospardy bekitti
ASTANA.KAZINFORM - Úkimet Memleket basshysynyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda berilgen tapsyrmalaryn oryndaý maqsatynda Qazaqstanda medıtsınalyq kómektiń sapasyn basqarýdy jetildirý jónindegi 2026–2030 jyldarǵa arnalǵan keshendi josparyn bekitti. Tıisti qaýlyǵa Premer-mınıstr Oljas Bektenov qol qoıdy.
Qujat derekterge, tsıfrlyq quraldarǵa, jasandy ıntellekt tehnologııalaryna negizdelgen medıtsınalyq qyzmetterdiń sapasyn baqylaýdyń jáne basqarýdyń zamanaýı úlgisine kóshýge baǵyttalǵan.
Úkimettiń baspasóz qyzmeti habarlaǵandaı, jospar medıtsınalyq kómektiń sapasy men qaýipsizdigin turaqty túrde jaqsartýǵa, protsesterdiń ashyqtyǵyn qamtamasyz etýge jáne retteýdiń tıimdiligin arttyrýǵa baǵyttalǵan birqatar júıeli sharany júzege asyrýdy qamtıdy.
Negizgi maqsat – patsıent medıtsınalyq qyzmetterdiń sapasyn baǵalaý jáne baqylaý protsesteriniń belsendi qatysýshysyna aınalatyn model qalyptastyrý.
Qujatta júıeni damytýdyń tórt strategııalyq baǵyty anyqtalǵan:
- medıtsınalyq qyzmet kórsetý salasyndaǵy retteýshi quraldardy jańǵyrtý;
- jasandy ıntellekt tehnologııalaryn qoldana otyryp, sapa saraptamasynyń jańa modelin qalyptastyrý jáne Ulttyq sapa ınstıtýtyn qurý;
- kásibı medıtsınalyq qoǵamdastyq pen patsıentterdiń rólin kúsheıtý;
- sapany basqarý júıesiniń tsıfrlyq transformatsııasy.
Jospardy júzege asyrý medıtsınalyq kómektiń sapasyn retteýdiń biryńǵaı júıesin qalyptastyrýǵa, medıtsınalyq uıymdar qyzmetiniń ashyqtyǵyn arttyrýǵa jáne basqarýshylyq sheshimderdi obektıvti derekter negizinde qabyldaýǵa múmkindik beredi.
Keshendi jospardy júzege asyrý nátıjesinde 2030 jylǵa qaraı medıtsınalyq qyzmetter sapasynyń negizgi kórsetkishterin jaqsartý kózdelip otyr.
Sapany basqarý júıesine tsıfrlyq transformatsııa júrgiziledi. Atap aıtqanda, profılaktıkalyq baqylaý júıesin engize otyryp, sarapshynyń avtomattandyrylǵan jumys orny qurylyp, lıtsenzııadan keıingi baqylaý protsesteri tsıfrlandyrylady.
Zańnamalyq ózgerister aıasynda 2028 jyldan bastap TMKKK jáne MÁMS aıasynda qyzmet kórsetetin medıtsınalyq uıymdardy mindetti akkredıtatsııalaý talabyn engizý, sondaı-aq akkredıtatsııadan keıingi monıtorıng júrgizý isin tsıfrlandyrý josparlanyp otyr.
Medıtsınalyq uıymdardy lıtsenzııadan keıingi monıtorıng qamtý deńgeıi 70%-ǵa jetedi, al olardyń keminde 80%-y jańa standarttar boıynsha akkredıtteledi.
Sonymen qatar Densaýlyq saqtaýdy damytýdyń ulttyq ǵylymı ortalyǵy bazasynda ádisnamalyq jáne taldamalyq ortalyq fýnktsııalaryn atqaratyn Ulttyq sapa ınstıtýtyn qurý josparlanyp otyr.
Instıtýt qyzmeti Dúnıejúzilik densaýlyq saqtaý uıymynyń tehnıkalyq qoldaýymen júzege asyrylyp, Qazaqstanda patsıentterdiń qaýipsizdigi boıynsha halyqaralyq deńgeıde moıyndalǵan úzdik standarttardy engizýge múmkindik beredi.
Budan bólek, medıtsınalyq kómektiń sapasyn basqarý protsesterinde medıtsınalyq qaýymdastyq pen patsıentterdiń rólin kúsheıtý kózdelgen. Kásibı birlestikter sapany táýelsiz saraptaýǵa jáne mamandardyń klınıkalyq oılaýyn baǵalaýǵa tartylady. Sonymen qatar patsıentterdi qoldaý qyzmetin tsıfrlandyrý azamattardyń ótinishterine naqty ýaqyt rejıminde jedel jaýap berýge múmkindik beredi.
Sondaı-aq 2028 jylǵa deıin medıtsınalyq kómek kórsetý standarttary men erejelerin tolyǵymen tsıfrlandyrý jáne 2027 jyly sapa saraptamasynyń úsh komponentti modelin engizý josparlanyp otyr.
2028 jylǵa qaraı medıtsınalyq kómektiń sapasy men kólemin baqylaý jaǵdaılarynyń keminde 20%-y jasandy ıntellekt tehnologııalaryn qoldaný arqyly júzege asyrylady.
Jospardy júzege asyrý júıeniń barlyq qatysýshysynyń is-qımylyn úılestirýdi qamtamasyz etedi, sapany basqarýdyń ashyqtyǵy men tıimdiligin arttyrýǵa múmkindik beredi.
Elimizde medıtsınalyq qyzmetterdi lıtsenzııalaý júıesi jańartylatynyn jazǵan bolatynbyz.
Medıtsınalyq qyzmetter men dári-dármek QQS-tan bosatyldy.
