Medıtsınalyq qaldyqtardy durys saqtamaǵan pavlodarlyq kompanııa qomaqty aıyppul arqalady

PAVLODAR. KAZINFORM - Pavlodar oblysy boıynsha ekologııa departamenti «BB-Group KZ» JShS-ne qatysty jospardan tys tekserý júrgizý kezinde birqatar zań buzýshylyqty anyqtady.

Tekserý nátıjesinde medıtsınalyq qaldyqtarmen jumys isteý boıynsha jobalyq qujattamaǵa memlekettik ekologııalyq saraptamanyń oń qorytyndysy alynbaǵany belgili boldy.

Óńirlik ekologııa departamenti «BB-Group KZ» JShS-ne qatysty jospardan tys tekserý júrgizip, qaýipti medıtsınalyq qaldyqtardyń jer ýchaskesinde durys ornalaspaý derekterin anyqtady.

- Kompanııa medıtsınalyq qaldyqtarmen jumys isteý boıynsha jobalyq qujattamaǵa memlekettik ekologııalyq saraptamanyń oń qorytyndysyn almaǵan. Al qaldyqtardyń jer ýchaskesine ornalastyrylýy ekologııalyq zańnama talaptaryna qaıshy keledi. Zańnamaǵa sáıkes, qaldyqtardy jınaqtaý tek arnaıy jabdyqtalǵan jáne belgilengen oryndarda — alańdarda, qoımalarda, saqtaý oryndarynda jáne konteınerlerde júzege asyrylýy tıis, - dep habarlady departamentten.

Joǵarydaǵydaı kemshilikterge jol bergeni úshin «BB-Group KZ» JShS Qazaqstan QR Ákimshilik quqyq buzýshylyq týraly kodeksiniń 332-babynyń 1-bóligi jáne 344-babynyń 2-bóligi boıynsha ákimshilik jaýapkershilikke tartylyp, 200 aılyq eseptik kórsetkish kóleminde aıyppul salyndy.

Sondaı-aq ekologtar medıtsınalyq qaldyqtarmen jumys isteý jónindegi jobalyq sheshimderge memlekettik ekologııalyq saraptamanyń oń qorytyndysy alynǵanǵa deıin seriktestiktiń jumysyn toqtata týrý týraly sotqa talap aryz túsirgen.

Eske sala keteıik buǵan deıin Pavlodarda júzdegen tonna úıilip jatqan medıtsınalyq qaldyqtar anyqtalǵany týraly jazǵanbyz. Qaldyqtar «BB-Group KZ» JShS-ne tıesili bolyp shyqqan.