Medıtsınalyq aıyqtyrǵyshtar túske deıin-aq tolyp qalady – mınıstrlik

El kóleminde ishimdik ishken adamdardy medıtsınalyq aıyqtyrǵysh mekemeleri jetispeıdi, dep habarlaıdy QazAqparat tilshisi.

«Otbasynda janjal shyǵarýshylar zorlyq-zombylyqty kóbine mas kúıinde jasaıdy. Alaıda búginde mas buzaqylardy oqshaýlaý máselesi sheshilgen joq. Elimiz boıynsha 35 ýaqytsha beıimdeý jáne detoksıkatsııa ortalyǵy bar. Mastardyń esin jınaıtyn medıtsınalyq aıyqtyrǵyshtarda 778 tósek-oryn ǵana bar. Bul óte az. Bıyl atalǵan ortalyqtarǵa alkogoldik masań kúıde 140 myńnan astam adam jetkizildi», - dedi Іshki ister vıtse-mınıstri Igor Lepeha Májilistiń zańnama jáne sot-quqyqtyq reforma komıtetiniń otyrysynda.

Onyń aıtýynsha, mastardy aparatyn medıtsınalyq aıyqtyrǵyshtar kúnniń birinshi jartysynda-aq tolyp qalady.

«Al ishimdik ishkender kóbine keshke jáne túnde ustalady. Mysaly, Óskemende 20 tósek-orynǵa arnalǵan bir ǵana mekeme jumys isteıdi. Olarǵa polıtseıler 12 myń quqyq buzýshyny jetkizedi. Olardyń tek 7 myńy ornalastyrylǵan. Sol sııaqty Pavlodarda 24 tósek-orynǵa bir ǵana ortalyq bar. Kókshetaýda múldem joq. Jalpy elimiz boıynsha taǵy 32 mekeme, ıaǵnı 594 tósek-oryn qajet», -deıdi ol.