Medıtsınalyq AI ónimderin tirkeý tártibin jeńildetý usynyldy
ASTANA. KAZINFORM – Qazaqstanda medıtsınalyq jasandy ıntellekt ónimderin tirkeý jáne naryqqa shyǵarý tártibin jeńildetý usynyldy. Qazir mundaı tehnologııalardy qoldanysqa engizý 6 aıdan 2 jylǵa deıin sozylýy múmkin. Bul másele Astanada Qaz.AI qaýymdastyǵy uıymdastyrǵan dóńgelek ústelde talqylandy.
Jasandy ıntellekt medıtsına salasynda aýrýlardy anyqtaý, medıtsınalyq derekterdi taldaý jáne dárigerlerdiń jumysyn jeńildetý úshin qoldanylyp keledi. Alaıda jańa tehnologııany ázirleý onyń tájirıbege tez engizilýine kepil emes. Ónimdi tirkeý, klınıkalyq tıimdiligin dáleldeý jáne qajetti derekterge qol jetkizý ázirleýshiler úshin áli de kúrdeli máselelerdiń biri.
Qaz.AI ókiliniń aıtýynsha, jasandy ıntellekt qarqyndy damyp jatqanymen, ony retteıtin zańdar men talaptar tehnologııanyń damý jyldamdyǵyna ilese bermeıdi. Keıbir erejeler eskirgendikten, startaptar jańa ónimderin qoldanysqa engizý kezinde kedergilerge tap bolady.
- Quryltaı depýtattarymen birlesip, qazirden bastap nazar aýdarýdy qajet etetin mańyzdy máselelerdi kóterýdi usynamyz. Zańnamaǵa ózgerister engizý 2027 jylǵa josparlanǵanymen, daıyndyq jumysyn búginnen bastaý kerek. Ázirge aıqyn kórinbegen máselelerdiń aldyn alyp, ózgeristerge aldyn ala daıyndalýymyz qajet, – dedi Qaz.AI Qazaqstandaǵy jasandy ıntellektti damytý qaýymdastyǵynyń tóraǵasy Temirlan Zııatov.
Dóńgelek ústelde medıtsınalyq AI ónimderin tirkeý rásimin ońtaılandyrý, tehnologııalardy synaqtan ótkizý jáne medıtsınalyq derekterge qoljetimdilikti qamtamasyz etý joldary talqylandy.
Jıyn qorytyndysy boıynsha qatysýshylar birlesken usynystar ázirlep, olardy Prezıdent Ákimshiligine, Úkimetke jáne tıisti memlekettik organdarǵa joldaýdy josparlap otyr.
Buǵan deıin jasandy ıntellektige negizdelgen otandyq startap Tokıodaǵy forýmda tanystyrylatyny týraly jazǵan edik.
