Medıtsınadaǵy tsıfrlandyrý: dárigerlerdiń júktemesi 40%-ǵa deıin azaıdy
ASTANA. KAZINFORM — Qazaqstanda medıtsınalyq qyzmetterdiń 88%-y elektrondy formatqa kóshti, dep habarlaıdy Úkimettiń baspasóz qyzmeti.
Memleket basshysy Qasym-Jomart Toqaevtyń tapsyrmalaryn oryndaý aıasynda Úkimet densaýlyq saqtaý júıesin tsıfrlyq transformatsııalaýdy jalǵastyryp keledi. Jańa sheshimder medıtsınalyq kómektiń qoljetimdiligin arttyrýǵa, dárigerlerge júktemeni azaıtýǵa jáne saladaǵy baqylaýdy kúsheıtýge baǵyttalǵan.
Med️ıtsına qyzmetkerleriniń júktemesi 30-40%-ǵa tómendedi
Biryńǵaı tsıfrlyq kontýrda 21,3 myńnan astam medıtsınalyq uıym, 275 myń medıtsına qyzmetkeri jáne 141 myń medıtsınalyq tehnıka týraly derekter jınaqtalǵan. Aqparattyq júıelerdiń ıntegratsııasy derekterdi qolmen engizýdi azaıtýǵa múmkindik berdi.
Densaýlyq saqtaýdaǵy memlekettik qyzmetterdiń 88% elektrondy túrde kórsetiledi
2025 jyly 215 mln-nan astam memlekettik qyzmettiń 190,8 mln-y elektrondyq formatta usynyldy. 8,5 mln-nan astam elektrondyq medıtsınalyq anyqtama berildi, 5,6 mln adam dárigerge onlaın-jazylýdy paıdalandy.
11 mln-nan asa áıelder men balalar densaýlyqtyń tsıfrlyq monıtorıngimen qamtylǵan
Tsıfrlyq baqylaý júıesinde shamamen 7 mıllıon bala men 4,3 mıllıon áıel bar. Dınamıkalyq baqylaýǵa taǵy 3,6 mln patsıent engizildi.
Tsıfrlyq tańbalaý zańsyz saýdadaǵy 21 myńnan astam dári-dármekti anyqtaýǵa kómektesti
Tańbalaý kodtary preparattardyń qaldyqtary men qozǵalysyn onlaın baqylaýǵa, olardyń qozǵalysyn qadaǵalaýǵa, aýytqýlardy anyqtaýǵa jáne zańsyz esepten shyǵarýdyń aldyn alýǵa múmkindik beredi.
Tsıfrlyq baqylaý 10,6 mlrd teńge bolatyn negizsiz medıtsınalyq qyzmetterdiń aldyn alýǵa járdemdesti
Tsıfrlyq sáıkestendirý 1 950 medıtsınalyq uıymda engizildi, qabyldaýlardyń 73%-ǵa jýyǵy Face ID jáne elektrondyq qujattardy paıdalana otyryp ótedi.
1,9 myńnan asa medıtsınalyq uıym Biryńǵaı memlekettik júıede biriktiriledi
Kelesi kezeń — dárigerler men AI-assıstent úshin biryńǵaı jumys ınterfeısi bar biryńǵaı memlekettik medıtsınalyq aqparattyq júıeni iske qosý. Densaýlyq saqtaýdy tsıfrlandyrý jekelegen servısterden derekterge negizdelgen biryńǵaı basqarý júıesine kóshedi. Medıtsınalyq kómek alýdyń barlyq kezeńderinde patsıentti súıemeldeıtin sheshimderdi biryńǵaı tsıfrlyq júıege biriktirý medıtsına qyzmetkerlerine júktemeni azaıtady jáne qyzmetterdi azamattar úshin yńǵaıly etedi.
Buǵan deıin Densaýlyq saqtaý mınıstrligi mektepke deıingi jáne mektep jasyndaǵy balalardy profılaktıkalyq medıtsınalyq qarap-tekserýden ótkizý boıynsha jańa qaǵıdalardy bekitti.
