Medıtsına stýdentterin qandaı ózgerister kútip tur

Reforma negizinen 2022 jyldan keıin oqýǵa túsken stýdentterdi qamtıdy, oǵan deıingi stýdentter úshin eshqandaı ózgeris joq.

Jańashyldyqtar qoldanystaǵy 6 jyldyq júıeniń (bakalavrıat + magıstratýra + 6 aılyq ınternatýra) birqatar máselesin sheshýge baǵyttalǵan. Qoldanystaǵy júıede bolashaq dárigerlerdiń qyzmetine kedergi keltiretin úsh negizgi shıkilik anyqtaldy. Jumysqa ornalasýdyń qıyndyǵy, praktıkanyń jetkiliksizdigi, sondaı-aq oqý barysynda týyndaıtyn tuıyq sheńber sııaqty ózekti sebepter ózgeris engizýdiń ózegi boldy.

— Osy jarty jylda stýdenttiń medıtsınada esh mártebesi bolmaıdy. Olar búginde aqparattyq júıege ene almaıdy, emdeý protsesine qatysýǵa da quqyǵy joq. Túptep kelgende, ol óz kúnin ózi kórýge májbúr, — dep málimdeıdi Aımaǵambetov.

Memleket osy máselelerdi sheshý úshin bilim berý formatyn qaıta qarastyryp, birqatar ózgeshelik engizdi. Birinshiden, bilim berý sapasyn arttyrý maqsatynda zamanaýı mazmundaǵy 7 jyldyq oqý formaty engiziledi. Oqý baǵdarlamasy boıynsha kredıt sany aıtarlyqtaı artady.

Ekinshiden, 7 jyldyq oqýdy aıaqtaǵan túlekter jalpy tájirıbelik dáriger (JTD) jáne alǵashqy medıtsınalyq-sanıtarııalyq kómek (MSAK) deńgeıindegi taǵy 5 baǵyt boıynsha jumysqa ornalasa alady. Tek tar beıindi mamandyqty kózdegen stýdentter ǵana rezıdentýrada bilimin jalǵastyrady.

Úshinshiden, anatomııa, fızıologııa sııaqty bazalyq pánder tıptik baǵdarlamalarda qatań bekitiledi. Stýdentter bazalyq bilimdi tolyq meńgergennen keıin táýelsiz alańda mindetti emtıhan tapsyrady.

Bir qýanyshtysy, 6-kýrs stýdentterine buryn-sońdy bolmaǵan resmı quqyqtyq mártebe ataýy beriledi.

— Stýdent alǵash ret resmı «dáriger-ıntern» mártebesine ıe bolady. Dáriger-ınternniń negizgi qyzmeti medıtsınalyq júıelerge qoljetimdilikke, tipti jalaqy alýǵa jáne qorǵanys quraldarymen qamtamasyz etilýge quqyq beredi, — dep baıandaıdy depýtat.

Reformanyń eń ozyq tusy — talapkerlerdiń múddesi eskerilgen. 2022 jyldan bastap medıtsınalyq oqýǵa túskender eki tańdaý jasaýǵa quqyly. Biri 6 jyldyq baǵdarlamamen oqýdy aıaqtap, birden rezıdentýraǵa tússe, ekinshisi jańa 7 jyldyq baǵdarlamaǵa aýysyp, oqý bitirgen boıda jumysqa ornalasa alady.

— Sheshimdi stýdentterdiń ózderi qabyldaýy kerek, — deý arqyly Ashat Aımaǵambetov irgeli ǵylymdaǵy oqýdyń damýshy kúshi retinde oqýshylardyń erik-qalaýyn alǵa tartady.

Reforma medıtsınalyq bilimniń qoljetimdiligin, praktıkalyq tıimdiligin arttyrýǵa baǵyttalǵan. Ol medıtsına «qazanynda qaınap jatqan» jastardy shynaıy dárigerlik tájirıbege baǵyttap, dıplom alǵan sátten-aq stýdentterdiń daıyn maman bolyp shyǵýyna jaǵdaı jasamaq.

Eske sala keteıik, budan buryn medıtsınalyq bilim berý salasyndaǵy jańashyldyqtardyń Parlament Májilisinde talqylanyp jatqanyn habarlaǵan edik.

Kúshine engen reforma ınternatýranyń formaldy kezeńin shynaıy klınıkalyq praktıkaǵa aınaldyryp, jas mamandardyń rezıdentýrasyz-aq alǵashqy medıtsınalyq-sanıtarııalyq kómek deńgeıinde tezirek jumys bastaýyna múmkindik beredi.

Aıaýlym Qanatqyzy