Medıtsına salasyndaǵy jemqorlyqtyń jartysynan kóbi byltyr Shymkentte tirkelgen

ASTANA. KAZINFORM — Densaýlyq saqtaý salasy elimizdegi jemqorlyq jaılaǵan TOP-3 salanyń tizimine kiredi. Bul týraly Sybaılas jemqorlyqqa qarsy kúres agenttiginiń resmı ókili málimdegen edi.

— Jalpy jemqorlyq faktileri eń kóp tirkelgen salalar — bilim berý, densaýlyq saqtaý jáne áleýmettik qamsyzdandyrý salalary. Byltyr elimizde 1 600-den astam sybaılas jemqorlyqqa qatysty qylmys anyqtaldy. Bul ister boıynsha 1 493 adam jaýapqa tartyldy. Olardyń 299-y — túrli vedomstvo basshysy. Tergeý nátıjesinde 914 adam sottaldy, onyń ishinde 326 adam bas bostandyǵynan aıyrylyp, 434 adamǵa jalpy kólemi 6,1 mlrd teńge aıyppul salyndy, — dedi Danııar Bekaıdarov.

Al densaýlyq saqtaý salasynda 2024 jyly 7 adam jemqorlyq deregi boıynsha sottalǵan. Onyń 4-eýi Shymkentte tirkelgen. Bul týraly Densaýlyq saqtaý mınıstrliginiń mamandary habarlady.

— Byltyr densaýlyq saqtaý salasynda jemqorlyq boıynsha 7 adam sottaldy. Onyń ishinde 4-eýi — azamattyq qyzmetker, 2-eýi — memlekettik qyzmetker, 1-eýi — memlekettik qyzmetkerge teńestirilgen tulǵa. Jemqorlyqtyń 4 faktisi Shymkent qalasynda, qalǵan derekter Soltústik Qazaqstan, Qyzylorda, Aqmola oblystarynda tirkeldi, — deıdi mınıstrlik mamandary.

Vedomstvo ókilderi naqty qandaı jemqorlyq derekteriniń jıi tirkelgenin de aıtty.

— Densaýlyq saqtaý salasynyń mamandary memlekettik qyzmet kórsetý jáne lıtsenzııalar berý kezinde jemqorlyqqa jıi jol beredi. Odan bólek zańsyz kelisim jasaý derekteri de kóp tirkeledi, — deıdi.

Eske sala keteıik, budan aldyn jemqorlyq jaıly habarlaǵan qazaqstandyqtar byltyr 35,5 mln teńge syıaqy alǵanyn jazǵan edik.