Medıtsına salasyndaǵy zań talaptaryn buzǵan tulǵalar jaýapqa tartyldy
ASTANA. KAZINFORM — ІІM dárilik zattardy saqtaý men ótkizý talaptary únemi baqylaýda ekenin eskertedi.
8–12 jeltoqsan aralyǵynda ІІM el aýmaǵyndaǵy baqylanatyn zattardyń zańdy aınalymy salasyndaǵy quqyq buzýshylyqtardyń jolyn kesýge, onyń ishinde quramynda esirtkisi bar dárilik preparattardy retseptsiz ótkizýge qarsy baǵyttalǵan «Dármek» kezekti aýqymdy jedel-profılaktıkalyq is-sharasynyń kezeńin ótkizdi.
Nátıjesinde belgilengen talaptardy buzýǵa jol bergen medıtsınalyq uıymdardyń laýazymdy tulǵalaryna qatysty Qylmystyq kodeksiniń 303-baby boıynsha 7 qylmystyq is qozǵaldy, 136 zańdy tulǵa, onyń ishinde 166 medıtsına qyzmetkeri ákimshilik jaýapkershilikke tartyldy.
Sıntetıkalyq esirtkilerdi óndirýde paıdalanylýy múmkin shamamen 1 myń tonna prekýrsordyń, 60 myńǵa jýyq tabletkanyń, 75 myńnan astam psıhoaktıvti preparatty ampýlalarynyń aınalymy shekteldi.
Atap aıtqanda, Qaraǵandy oblysynda Reseı Federatsııasynyń aýmaǵynan jetkizilgen 64 tonna kúkirt qyshqyly saqtalǵan temirjol tsısternasynyń tehnıkalyq nyǵaıtylýy talaptarǵa saı kelmeıtini anyqtaldy.
Shymkent qalasynda medıtsınalyq mekemelerdiń birinde lıtsenzııalyq talaptardyń buzylýy anyqtalyp, sonyń nátıjesinde psıhotroptyq preparattardyń 50 myń birligi aınalymǵa jiberilmedi. Túrkistan oblysynda zańdy tulǵalardyń biri 100 tonna kúkirt qyshqylyn mamandandyrylǵan kúzettiń súıemeldeýinsiz tasymaldaǵan. Al Jetisý oblysynda sıntetıkalyq esirtkilerdi daıyndaýda qoldanylatyn efedra prekýrsorynyń 200 keli tárkilendi.
Almaty oblysynda medıtsına qyzmetkerleri baqylanatyn preparattardy arnaıy jabdyqtalǵan qoımaǵa emes, reanımatsııalyq palatada saqtaǵan. Іshki ister mınıstrligi esirtki quraldarynyń, psıhotroptyq zattar men prekýrsorlardyń aınalymyn júzege asyratyn barlyq zańdy tulǵany olardy tasymaldaý, saqtaý, paıdalaný jáne ótkizý normalaryn qatań saqtaýǵa shaqyrady.
Eske salamyz, esirtkilerdiń zańdy aınalymy salasyndaǵy zańnamany buzǵany úshin qylmystyq jáne ákimshilik jaýapkershilik kózdelgen. Sonymen qatar Qazaqstan Respýblıkasynyń azamattary el aýmaǵynan tys jerge shyqqanda kelesi mán-jaıǵa erekshe nazar aýdarýy qajet. Keıbir memleketterde, onyń ishinde Reseı Federatsııasynda, elimizdiń aýmaǵynda tyıym salynbaǵanyna qaramastan, garmala (adyraspan) ósimdigin ákelýge, áketýge, tasymaldaýǵa jáne saqtaýǵa tyıym salynǵan.
Aıta ketelik Shymkentte jalǵan lımonad satqan turǵyn ustaldy.