Medıtsına mekemelerine kene shaqqan 186 almatylyq júgindi
ALMATY. KAZINFORM – Almatyda 186 adamdy kene shaqty. Onyń 89-y bala. Bul týraly qalalyq sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova málim etti.
– Kenelerge qarsy baqylaý entomologııalyq ádistermen de júrgiziledi. Epıdemııa maýsymynyń basynda mamandar adamdardan jınalǵan 34 kene úlgisin zerttedi. Bir úlgide keneli entsefalıt antıgeni tabyldy. Shaǵý oqıǵasy Almaty oblysynda bolǵany anyqtaldy,— dep atap ótti ol.
Spıker, byltyr kene arqyly juqqan, mı júıkelerin qurtatyn entsefalıtiniń úsh jaǵdaıy, sondaı-aq kene borrelıozynyń bir jaǵdaıy tirkelgenin atap ótti.
– Aldyn alý sharalary retinde biz almatylyqtardy jabyq kıim kıip, repellentterdi qoldanýǵa, tabıǵatta serýendengennen keıin ózderin jáne jeke zattaryn muqııat tekserýge keńes beremiz. Kene shaqqannan keıin tórt kúnnen keshiktirmeı medıtsınalyq kómekke júginý mańyzdy, — deıdi epıdemıolog.
Sondaı-aq, ol qalada qosymsha vaktsınatsııa bar ekenin tilge tıek etti.
– Densaýlyq saqtaý basqarmasynyń qoımasynda belgııalyq TicoVac vaktsınasynyń 11 447 dozasy bar. Bastapqy kýrs úsh dozadan turady, biraq qysta egýge úlgermegender úshin shuǵyl shema qarastyrylǵan,– dedi ol.
Kene entsefalıtinen qalaı saqtanýǵa bolatynyn myna jerden oqı alasyzdar.