Medıtsına mamandaryna jasandy ıntellektini qoldanýdy úıretý qajet – professor
ASTANA. KAZINFORM – Medıtsına mamandaryna naýqasqa medıtsınalyq kómek kórsetý kezinde jasandy ıntellektini paıdalanyp, sheshim qabyldaýdy úıretý qajet. Bul týraly Nazarbaev Ýnıversıteti Medıtsına mektebiniń professory, bıomedıtsınalyq ǵylymdar kafedrasynyń meńgerýshisi Antonıo Sarrııa-Santamera Astanada ótken halyqaralyq kongress barysynda Kazinform tilshisine bergen suhbatynda aıtty.
Professordyń sózinshe, qazir búkil álemde jasandy ıntellektini medıtsınada tıimdi paıdalaný joldary qarastyrylyp jatyr.
– Belgili bir aýrýlarǵa arnalǵan júıeler qazirdiń ózinde jumys istep tur. Endi medıtsına mamandaryna naýqasqa medıtsınalyq kómek kórsetýge qatysty sheshim qabyldaǵanda jasandy ıntellektini qalaı paıdalaný kerektigin úıretý qajet. Bul Qazaqstanǵa ǵana emes, búkil álemge ortaq mindet, – dedi ol.
Sarapshy jasandy ıntellektini medıtsınada damytýdyń eki negizgi baǵytyn atap ótti. Birinshisi – naýqastyń densaýlyǵyna qatysty derekterdi taldap, jeke erekshelikterine saı medıtsınalyq kómek kórsetý. Ekinshisi – medıtsınalyq keskinderdi taldaý jáne patomorfologııalyq zertteýler júrgizý kezinde aýrýlardy anyqtaý múmkindigin keńeıtý.
Professordyń pikirinshe, jasandy ıntellektini aýrýdyń aldyn alý úshin de tıimdi paıdalanýǵa bolady.
– Máselen, qant dıabetiniń aldyn alýǵa bolatynyn bilemiz. Biraq ár adamǵa qandaı tásil tıimdi ekenin anyqtaý mańyzdy. Bul dári-dármekpen emdeýmen shektelmeıdi. Adamdarǵa densaýlyǵyn kútý joldaryn túsindirip, ár adamǵa nemese halyqtyń belgili bir tobyna qajetti keńes berý mańyzdy. Osy turǵydan alǵanda, jasandy ıntellektiniń múmkindigi zor, – dedi Antonıo Sarrııa-Santamera.
Sarapshynyń aıtýynsha, qazirgi mindet – jasandy ıntellektini densaýlyq saqtaý salasyndaǵy naqty máselelerdi sheshýge kómektesetin qural retinde damytý.
Aıta keteıik, buǵan deıin elimizde ókpe obyryn jasandy ıntellekt arqyly erte anyqtaý júıesin engizýge ne kedergi bolyp otyrǵanyn jazǵanbyz.
