Medıtsına mamandaryna arnalǵan qalta anyqtamalyǵy shyǵaryldy
ASTANA. KAZINFORM – Qazaqstan balalar men jasóspirimderge medıtsınalyq-sanıtarııalyq alǵashqy kómekti nyǵaıtý úshin DDU-nyń qaltaly anyqtamalyǵynyń beıimdelgen nusqasyn iske qosty. Bul týraly DSM baspasóz qyzmeti habarlady.
Bul bastama balalar men jasóspirimderge medıtsınalyq-sanıtarııalyq alǵashqy kómek (MSAK) deńgeıinde kómek kórsetý júıesin nyǵaıtý jolyndaǵy mańyzdy qadam boldy.
DDU-nyń qalta anyqtamalyǵy — dárigerlerdi, meıirgerlerdi jáne basqa da MSAK mamandaryn sapaly, dáleldi medıtsınalyq kómek kórsetýde qoldaıtyn zamanaýı, praktıkalyq jáne keshendi qural. Qujatta densaýlyqty nyǵaıtý, aýrýlardyń profılaktıkasy, kúndelikti tekserýler júrgizý, jaǵdaılardy erte anyqtaý jáne jasóspirimderge konsýltatsııa berý, balanyń saý ósýi men damýyn qoldaý úshin otbasymen árbir ózara is-qımyldy paıdalaný múmkindigi bar.
— DDU-men birlesip biz balalarǵa kómektesýdiń barlyq kezeńderinde senimdi jáne tıimdi sheshim qabyldaýdy qoldaıtyn biryńǵaı, zamanaýı jáne praktıkalyq qural ázirledik. Bizdiń basymdyǵymyz — Qazaqstandaǵy árbir otbasyna kelesi urpaqtyń salaýatty damýyna yqpal etetin sapaly, dálelderge negizdelgen jáne qoljetimdi qyzmetterge qoljetimdilikti qamtamasyz etý, — dep atap ótti Densaýlyq saqtaý vıtse-mınıstri Álııa Rústemova.
Anyqtamalyqty ulttyq kontekstke beıimdeý úshin 2024-2025 jyldary DDU qoldaýymen Densaýlyq saqtaý mınıstrliginiń basshylyǵymen pánaralyq jumys toby quryldy. Onyń quramyna 30 ulttyq jáne óńirlik MSAK úılestirýshisi, jetekshi medıtsınalyq joǵary oqý oryndarynyń sarapshylary, sondaı-aq psıhıatrııa, pedıatrııalyq akýsherlik jáne gınekologııa, travmatologııa jáne neonatologııa salasyndaǵy mamandar kirdi.
Birneshe aı boıy jumys toby DDU usynymdaryn qoldanystaǵy klınıkalyq hattamalarmen, normatıvtik talaptarmen jáne Qazaqstanda qyzmet kórsetý júıesimen salystyra otyryp, qujatqa egjeı-tegjeıli taldaý júrgizdi. Beıimdelý protsesi DDU-nyń medıtsınalyq kómektiń sapasy jáne patsıentterdiń qaýipsizdigi jónindegi ofısimen (Afına, Gretsııa) jáne DDU-nyń halyqaralyq sarapshysymen birlesip júzege asyryldy, bul densaýlyq saqtaýdyń ulttyq qajettilikterin eskere otyryp, jahandyq dálelder men standarttarǵa sáıkestikti saqtaýǵa múmkindik berdi.
Anyqtamalyqtyń ulttyq beıimdelgen nusqasy Densaýlyq saqtaý mınıstrliginiń jáne Pedıatrııa jáne balalar hırýrgııasy ǵylymı ortalyǵynyń resmı saıtynda ashyq qoljetimdilikte ornalastyrylǵan.
— Jumys toby usynymdardy normatıvtik talaptar men qyzmet kórsetý qurylymynyń qazaqstandyq kontekstine ıntegratsııalaý boıynsha aıtarlyqtaı jumys atqardy. Beıimdelýdi aıaqtaý jáne qorytyndy nusqany iske qosý qujatty medıtsınalyq qaýymdastyqqa resmı túrde usynýǵa jáne ony is júzinde júzege asyrýǵa múmkindik beredi. DDU bul jolda Qazaqstannyń qoldaýyn maqtan tutady, — dep atap ótti DDU-nyń Qazaqstandaǵy ókili doktor Skender Syla.
Jumys LEGO Qorynyń qarjylyq qoldaýymen «Densaýlyq saqtaý jáne onymen baılanysty sektorlar arqyly ata-analarǵa qoldaý kórsetý úshin ǵylymı negizdelgen aralasýdy keńeıtýdi qoldaý» ulttyq jobasynyń sheńberinde oryndaldy.
Aıta ketelik almatylyqtarǵa tegin beriletin dári-dármekter tizimine qatysty máslıhat ózgerister engizdi.