Medıtsına kúnderi men kadr daıarlaý: Qazaqstan men Tájikstan seriktestikti tereńdetpek
ASTANA. KAZINFORM — Qazaqstannyń Tájikstandaǵy elshisi Ýálıhan Tórehanov Tájikstannyń Densaýlyq saqtaý jáne halyqty áleýmettik qorǵaý mınıstri Djamolıddın Abdýllozodamen kezdesti, dep habarlaıdy QR SІM baspasóz qyzmeti.
— Kezdesý barysynda densaýlyq saqtaý salasyndaǵy ekijaqty yntymaqtastyqtyń ózekti máseleleri talqylandy. Atap aıtqanda, Tájikstanda Qazaqstannyń medıtsınasy kúnderin ótkizý, eki eldiń medıtsınalyq mekemeleri arasyndaǵy tájirıbe almasýdy damytý, sondaı-aq medıtsınalyq mamandardyń biliktiligin arttyrý máselelerine erekshe nazar aýdaryldy, — delingen habarlamada.
Taraptar densaýlyq saqtaý, zamanaýı medıtsınalyq tehnologııalardy engizý, kadrlyq áleýetti damytýǵa baǵyttalǵan Qazaqstan men Tájikstannyń tıisti vedomstvolary arasyndaǵy 2026–2027 jyldarǵa arnalǵan Yntymaqtastyq josparyna qol qoıylǵanyn qanaǵattanýshylyqpen atap ótti.
Kún tártibiniń jeke tarmaǵy retinde Qazaqstannyń Densaýlyq saqtaý mınıstrligi men Tájikstannyń Densaýlyq saqtaý jáne halyqty áleýmettik qorǵaý mınıstrligi arasyndaǵy densaýlyq saqtaý salasyndaǵy yntymaqtastyq týraly kelisimdi daıyndaý jáne oǵan qol qoıý máselesi talqylandy. Atalǵan qujatqa qol qoıý seriktestikti odan ári tereńdetý jáne birlesken jobalardy iske asyrý úshin berik normatıvtik-quqyqtyq negiz qalyptastyrýǵa baǵyttalǵan.
Taraptar ekijaqty ózara is-qımyldy odan ári nyǵaıtýǵa múddelilik bildirip, eki memlekettiń densaýlyq saqtaý júıelerin damytý múddesinde belsendi ári syndarly dıalogty jalǵastyrýǵa daıyn ekendikterin rastady.
Budan buryn Tájikstan ekonomıkasy 2025 jyly 8,4%-ǵa óskeni anyqtaldy.