Medıtsına qyzmetkerleriniń jalaqysy qanshaǵa ósedi: aımaq, eńbek ótili eskerile me

Bul týraly Qazaqstan Respýblıkasynyń Prezıdenti Qasym-Jomart Toqaev halyqqa arnaǵan «Qazaqstannyń jańa tarıhı kezeńdegi ózekti mindetteri» atty jyl saıynǵy Joldaýynda málimdedi.

— Biz medıtsınalyq-sanıtarııalyq alǵashqy kómek júıesin jańǵyrtýǵa da erekshe nazar aýdaryp otyrmyz. Osyǵan baılanysty jalpy praktıka dárigerleriniń ókilettikterin keńeıtip, bul júıeni qarjylandyrý kólemin kezeń-kezeńimen ulǵaıtý mańyzdy. Úkimetke kelesi jylǵy 1 qańtardan bastap osy baǵytta jumys isteıtin ýchaskelik qyzmet mamandarynyń jalaqysyn úzdiksiz eńbek ótiline qaraı 40 paıyzǵa deıin arttyrýdy tapsyramyn. Bul 77 myńnan astam mamannyń tabysyn kóbeıtýge múmkindik beredi, — dep atap ótti Memleket basshysy.

Qosymsha aqynyń mólsheri eńbek ótiliniń uzaqtyǵyna baılanysty belgilenedi. Ol laýazymdyq jalaqynyń 50 paıyzyna deıin jetýi múmkin.

Qosymsha aqynyń mynadaı mólsherlerin belgileý usynylady:

* 2 jyldan astam úzdiksiz eńbek ótili úshin — laýazymdyq jalaqynyń 20%-y;
* 3 jyldan astam eńbek ótili úshin — 30%-y;
* 5 jyldan astam eńbek ótili úshin — 50%-y.

Jańa shara medıtsınalyq kadrlardy, eń aldymen, medıtsınalyq-sanıtarııalyq alǵashqy kómek uıymdary men aýyldyq medıtsınalyq uıymdarda turaqtandyrýǵa baǵyttalǵan.

— Memleket basshysynyń qoldaýymen medıtsınalyq alǵashqy kómek býynynyń kadrlyq áleýetin nyǵaıtý úshin alǵash ret osyndaı aýqymdy qoldaý sharalary qabyldanyp otyr. Bizdiń basymdyǵymyz — emhanalar men aýyldyq dárigerlik ambýlatorııalarda halyqqa kórsetiletin medıtsınalyq kómektiń sapasy men qoljetimdiligin arttyrý. Bul jalpy praktıka dárigerleri men ýchaskelik qyzmet meıirgerleriniń biliktiligi men tájirıbesine tikeleı baılanysty, — dep atap ótti Densaýlyq saqtaý mınıstri.

Úzdiksiz eńbek ótili úshin qosymsha aqy engizilgennen keıin aýyldyq jerlerdegi eń joǵary eńbek ótili bar jalpy praktıka dárigerleriniń jalaqysy qosymsha aqyny eskergende 760 myń teńgege, al qalalarda 607 myń teńgege deıin jetýi múmkin.

Aýyldyq jerlerde eń joǵary eńbek ótili bar jalpy praktıka dárigerleriniń jalaqysy 534 myń teńgeden 760 myń teńgege deıin, al orta medıtsına personalynyń jalaqysy 284 myń teńgeden 401 myń teńgege deıin ósýi múmkin.

Qalalarda eń joǵary eńbek ótili bar jalpy praktıka dárigerleriniń jalaqysy 425 myń teńgeden 607 myń teńgege deıin, al orta medıtsına personalynyń jalaqysy 224 myń teńgeden 318 myń teńgege deıin artýy yqtımal.

Eń az eńbek ótili bar mamandardyń eńbekaqysyn arttyrý da kózdelgen. Aýyldyq jerlerde jalpy praktıka dárigerleriniń jalaqysy 386 myń teńgeden 450 myń teńgege deıin, al orta medıtsına personalynyń jalaqysy 221 myń teńgeden 256 myń teńgege deıin ósýi múmkin.

Qalalarda eń az eńbek ótili bar jalpy praktıka dárigerleriniń jalaqysy 307 myń teńgeden 358 myń teńgege deıin, al orta medıtsına personalynyń jalaqysy 173 myń teńgeden 202 myń teńgege deıin kóterilýi yqtımal.

Medıtsınalyq alǵashqy kómek býynynda jumys isteıtin psıhologtar men áleýmettik qyzmetkerlerge de qosymsha qoldaý kórsetý usynylyp otyr. Olardyń qyzmetiniń ereksheligin eskere otyryp, psıhoemotsııalyq júktemesi úshin qosymsha aqy engizý máselesi qarastyrylýda.

Densaýlyq saqtaý mınıstrliginiń málimetinshe, medıtsına qyzmetkerleriniń jalaqysyn arttyrý jumystary 2021 jyldan bastap kezeń-kezeńimen júrgizilip keledi.
Infektsııalyq qyzmet pen jedel medıtsınalyq járdem qyzmetkerlerine arnalǵan qosymsha qoldaý sharalary da iske asyrylýda. 2026 jyldyń basynan bastap ınfektsııalyq qyzmettiń shamamen 24 myń mamany men jedel medıtsınalyq járdemniń 9 myń qyzmetkerine joǵarylatylǵan tólemder qarastyrylǵan.

Úzdiksiz eńbek ótili úshin qosymsha aqy engizý tájirıbeli mamandardy qoldaýǵa, emhanalar men dárigerlik ambýlatorııalarda jumys isteýge yntalandyrýǵa, sondaı-aq medıtsınalyq kadrlardy, ásirese aýyldyq jerlerde, turaqtandyrýǵa baǵyttalǵan.

Bul sharalardy iske asyrý ýchaskelik qyzmetti nyǵaıtýǵa, kadr tapshylyǵyn azaıtýǵa jáne halyq úshin medıtsınalyq kómektiń qoljetimdiligin arttyrýǵa múmkindik beredi dep kútilýde.

Aıta ketelik 1 qańtardan ýchaskelik qyzmet mamandarynyń jalaqysy 40 paıyzǵa deıin artatyny týraly jazǵan edik.