Medıtsına qyzmetkerleriniń quqyǵy men qaýipsizdigi kúsheıtiledi
ASTANA. KAZINFORM –Densaýlyq saqtaý mınıstrliginde AQNIET, SENIM, QazMed kásipodaq uıymdarynyń kóshbasshylarymen jáne «Medıtsınalyq uıymdardyń qazaqstandyq alıansy» RQB jumys berýshiler birlestigimen 2026-2028 jyldarǵa arnalǵan densaýlyq saqtaý salasyndaǵy áleýmettik áriptestik týraly salalyq kelisimge qol qoıyldy.
Mınıstrlik málimetinshe, bul kelisim densaýlyq saqtaý salasyndaǵy áleýmettik-eńbek qatynastaryn retteıtin quqyqtyq akt bolyp tabylady jáne medıtsına qyzmetkerleriniń áleýmettik qorǵalýyn arttyrýǵa, salanyń kadrlyq áleýetin damytýǵa jáne áleýmettik dıalogty nyǵaıtýǵa baǵyttalǵan.
Kelisim jumyspen qamtý, eńbekaqy tóleý, áleýmettik kepildikter, eńbekti qorǵaý jáne áleýmettik-eńbek janjaldarynyń aldyn alý máselelerin qamtıdy. Qujatta medıtsınalyq uıymda ujymdyq shart bolmaǵan kezde kelisimniń tikeleı qoldanylýy, sondaı-aq onyń kepildikterin kásipodaq emes qyzmetkerlerge taratý múmkindigi bekitilgen.
Negizgi jańalyqtardyń biri qyzmetkerdiń jumys jáne jeke ýaqyt teńgerimin saqtaý quqyǵyn bekitý boldy. Atap aıtqanda, kelisimde medıtsına qyzmetkeriniń shuǵyl qajettilik jaǵdaılaryn, kezekshilikterdi jáne eńbek zańnamasynda kózdelgen ózge de jaǵdaılardy qospaǵanda, qyzmettik kommýnıkatsııalarǵa jáne eńbek mindetterin belgilengen jumys ýaqytynan tys oryndaýǵa tartylmaý quqyǵy kózdelgen.
Sondaı-aq, qujatta jumys ýaqytynyń bir bóligi retinde tsıfrlyq júktemeni esepke alý kózdelgen. Ol qyzmette aqparattyq júıelerdi, messendjerlerdi jáne ózge de tsıfrlyq quraldardy paıdalaný kezinde jasyryn qaıta óńdeýge jol bermeýge baǵyttalǵan. Kelisimniń erejeleri medıtsına qyzmetkerine qabyldanǵan sheshimder úshin jaýapkershilikti saqtaı otyryp, tsıfrlyq sheshimder men jasandy ıntellekt tehnologııalaryn engizýdi retteý tásilderin belgileıdi. Kelisimde personal sanynyń qysqarýy kezinde kepildikter kúsheıtildi, qyzmetkerlerdiń áleýmettik osal sanattaryn jumyspen qamtýdy saqtaýdyń basymdyǵy bekitildi. Sondaı-aq erekshe jaǵdaılarda jumys istegeni úshin qosymsha aqylar, ústeme jumys úshin joǵary aqy jáne saýyqtyrý úshin tólemder kózdelgen.
Kelisimniń jeke bólimi kadrlyq áleýetti damytýǵa arnalǵan. Medıtsınalyq jáne farmatsevtıkalyq kadrlarǵa qajettiliktiń jyl saıynǵy monıtorıngi, keminde bes jylda bir ret qyzmetkerlerdiń biliktiligin arttyrý, jas mamandar úshin tálimgerlikti damytý jáne bitirgennen keıingi birinshi jyl ishinde synaq merziminsiz túlekterdi jumysqa ornalastyrý kózdelgen. Budan basqa, kelisim qaýipsiz eńbek jaǵdaılaryn qamtamasyz etý, medıtsına qyzmetkerlerine qatysty zorlyq-zombylyqtyń aldyn alý jáne áleýmettik-eńbek janjaldarynyń aldyn alý úshin medıatsııa tetikterin damytý jónindegi talaptardy kúsheıtedi.
2026-2028 jyldarǵa arnalǵan Salalyq kelisimdi iske asyrý densaýlyq saqtaýdaǵy áleýmettik áriptestiktiń turaqty júıesin qalyptastyrýǵa jáne medıtsınalyq kásipterdiń bedelin arttyrýǵa baǵyttalǵan.
Aıta keteıik, endi medıtsına qyzmetkerlerine kúsh qoldanǵandar 12 jylǵa deıin sottalady.