Medıtsına qyzmetkerleriniń kásibı mártebesi týraly zań jobasyn ázirleý jumysy bastaldy
ASTANA. KAZINFORM — Quryltaı depýtaty Dana Medeýovanyń bastamasymen ázirlenip jatqan «Medıtsına qyzmetkerleriniń kásibı mártebesi jáne qyzmetiniń kepildikteri týraly» zań jobasy boıynsha jumys tobynyń alǵashqy otyrysy ótti, dep habarlaıdy Kazinform «Ádilet» partııasynyń baspasóz qyzmetine silteme jasap.
Otyrysta zań jobasyn ázirleý jumysynyń negizgi baǵyttary aıqyndalyp, medıtsına qyzmetkerleriniń eńbekaqysyna qatysty máselege erekshe nazar aýdaryldy.
Zań jobasynyń basty maqsaty — halyqtyń densaýlyǵyn saqtaý jáne nyǵaıtý, medıtsınalyq kómektiń sapasyn arttyrý men azamattardyń ómir súrý sapasyn jaqsartý.
Osy maqsattarǵa qol jetkizý úshin medıtsına qyzmetkerleriniń kásibı mártebesin nyǵaıtý, olardyń quqyqtyq jáne áleýmettik qorǵalýyn qamtamasyz etý, sondaı-aq patsıentterdiń múddesi úshin kásibı qyzmet atqarýǵa laıyqty jaǵdaı jasaý kózdelip otyr.
Otyrysqa Bas Prokýrordyń birinshi orynbasary Jandos Ómirálıev, Densaýlyq saqtaý birinshi vıtse-mınıstri Tımýr Sultanǵazıev, Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev, Qorǵanys mınıstriniń orynbasary Asqar Mustabekov, Іshki ister mınıstriniń orynbasary Abaı Qaıyrbekov, Tótenshe jaǵdaılar vıtse-mınıstri Kegen Tursynbaev, Ulttyq ekonomıka vıtse-mınıstri Baýyrjan Omarbekov, Ádilet vıtse-mınıstri Aıdar Jarylǵanov, Qarjy vıtse-mınıstri Dáýren Temirbekov, Jasandy ıntellekt jáne tsıfrlyq damý vıtse-mınıstri Bahtııar Muhametqalıev, Sot ákimshiligi basshysynyń orynbasary Asylbek Mýsralınov, sondaı-aq medıtsınalyq uıymdar men sarapshylar qaýymdastyǵynyń ókilderi qatysty.
Jumys tobynyń otyrysyna qatysqan memlekettik organdardyń ókilderi jańa zań jobasynyń tujyrymdamasyna oń qorytyndy berdi.
Kelesi otyrysty kelip túsken usynystar pysyqtalǵannan keıin ótkizý josparlanyp otyr.
