Medıtsına qyzmetkerlerine túsetin júktemeni azaıtý úshin ne istelinip jatyr
ASTANA. KAZINFORM – 2026 jyldyń jeltoqsanynda medıtsıalyq bólek-bólek tsıfrlyq júıeler e-Densaulyq ekojúıesine tolyqtaı toptastyrylady. Bul týraly Quryltaı depýtattarynyń saýalyna Densaýlyq saqtaý vıtse-mınıstri Tımýr Sultanǵazıevtiń jaýabynda aıtylǵan.
- Qazirgi ýaqytta mınıstrlik berilgen tapsyrmany oryndaý aıasynda 23 bólek Medıtsınalyq tsıfrlyq júıeden jeti komponentten turatyn e-Densaulyq ekojúıesine kóshý jumystaryn júrgizip jatyr. Búginde onyń bes komponenti paıdalanýǵa berildi. Al qalǵan eki komponentti iske qosýdy 2026 jylǵy jeltoqsan aıynda aıaqtaý josparlanǵan. Atalǵan jumystyń negizgi maqsaty – medıtsına qyzmetkerlerge túsetin ákimshilik júktemeni azaıtý jáne derekterdi qaıtalap engizý jaǵdaılaryn boldyrmaý, - dedi ol.
Onyń aıtýynsha, ekojúıeniń negizin 2012 jyldan bastap jınaqtalǵan medıtsınalyq derekterdi qamtıtyn Biryńǵaı medıtsınalyq derekter qoımasy quraıdy. Qoımanyń negizgi maqsaty – halyqtyń densaýlyq jaǵdaıy jáne kórsetilgen medıtsınalyq kómek týraly aqparatty shoǵyrlandyrýdy, saqtaýdy, óńdeýdi jáne taldaýdy qamtamasyz etetin medıtsınalyq derekterdiń biryńǵaı ortalyqtandyrylǵan kózin qalyptastyrý.
- Biryńǵaı medıtsınalyq derekter qoımasy tsıfrlyq júıesi 2026 jylǵy sáýirde tájirıbelik paıdalanýǵa engizildi. Júıe mınıstrliktiń qoldanystaǵy 8 tsıfrlyq júıesin biriktirýge, sondaı-aq densaýlyq saqtaý sýbektilerinen kelip túsetin medıtsınalyq derekterdi ortalyqtandyrylǵan túrde jınaýǵa, saqtaýǵa jáne óńdeýge baǵyttalǵan. Qazirgi ýaqytta Biryńǵaı medıtsınalyq derekter qoımasy mindetti áleýmettik medıtsınalyq saqtandyrý jáne tegin medıtsınalyq kómektiń kepildik berilgen kólemi aıasynda medıtsınalyq kómek kórsetetin medıtsınalyq uıymdarda jumys isteıtin 12 Medıtsınalyq tsıfrlyq júıemen ıntegratsııalanǵan, - dedi Tımýr Sultanǵazıev.
Vıtse-mınıstrdiń atap ótýinshe, medıtsına uıymdary men memlekettik tsıfrlyq júıelerden alynatyn derekter biryńǵaı qoımada jınaqtalyp, patsıenttiń densaýlyq jaǵdaıy týraly tsıfrlyq tarıhyn qalyptastyrýǵa negiz bolady. Sonymen qatar, Medıtsınalyq tsıfrlyq júıeden beriletin derekterdiń sapasyn qamtamasyz etý jáne negizsiz málimetterdiń engizilýine jol bermeý maqsatynda 480-nen astam formattyq-logıkalyq baqylaý iske asyryady. Atalǵan júıeni damytý medıtsınalyq derekterdi biryńǵaı ortalyqtandyrylǵan ortada jınaqtaýǵa, patsıenttiń medıtsınalyq aqparatynyń tolyqtyǵy men ózektiligin qamtamasyz etýge, sondaı-aq medıtsına qyzmetkerleriniń patsıent týraly qajetti málimetterge qol jetkizý múmkindikterin keńeıtýge baǵyttalǵan.
- Budan bólek, mınıstrlik biryńǵaı medıtsınalyq derekter negizinde medıtsınalyq kómekti tsıfrlandyrýdyń kelesi kezeńi retinde Biryńǵaı memlekettik medıtsınalyq aqparattyq júıesin iske asyryp jatyr. Jobanyń maqsaty - densaýlyq saqtaý salasynda biryńǵaı tsıfrlyq keńistikti qalyptastyrý, jeke medıtsınalyq aqparattyq júıelerge táýeldilikti joıý, medıtsına qyzmetkeriniń biryńǵaı tsıfrlyq jumys ornyn qurý, medıtsınalyq derekterdi ortalyqtandyrylǵan basqarýdy qamtamasyz etý, sondaı-aq medıtsınalyq kómek kórsetýdiń sapasyn, ashyqtyǵyn jáne tıimdiligin arttyrý. Osy jyly jeltoqsanda Biryńǵaı memlekettik medıtsınalyq aqparattyq júıesiniń «Ambýlatorııalyq-emhanalyq kómek» jáne «Statsıonarlyq kómek» qosalqy júıelerin tájirıbelik paıdalanýǵa engiziledi, - dedi ol.
Buǵan deıin sheteldik emdelýshilerge arnalǵan mamandandyrylǵan jýrnal shyǵarylatynyn jazǵan edik.
