Medıtsına qyzmetkerlerine shabýyl jasaǵandarǵa jaýapkershilik qashan qatańdatylady

ASTANA. KAZINFORM – Búgin Úkimet otyrysynan keıingi brıfıngide Aqmaral Álnazarova medıtsına qyzmetkerlerine shabýyl jasaǵandarǵa qashan zań qatańdatylatynyn aıtty. 

Onyń dereginshe, keıingi 5 jylda elimizde medıtsına qyzmetkerlerine shabýyl jasaýdyń shamamen 175 faktisi tirkelgen.

– Statıstıka kóńil kónshitpeıdi jáne ol jyldan jylǵa artyp kele jatyr. Búginde Prezıdenttiń tapsyrmasymen medıtsına qyzmetkerlerine shabýyl jasaǵany úshin ákimshilik jaýapkershilikti kúsheıtip, qylmystyq jaýapkershilik engizý boıynsha sharalar ázirlendi. Qazirgi ýaqytta ol barlyq memlekettik organmen, Prezıdent ákimshiligimen jáne Bas prokýratýramen kelisý satysynan ótti. Parlament depýtattarynyń qoldaýymen osy jylydń sońyna deıin bul túzetýlerdi qabyldaımyz dep oılaımyn, - dedi ol.

Buǵan deıin Májilis depýtaty Ashat Aımaǵambetov dárigerlerge jasalǵan shabýyl polıtsııa qyzmetkerlerine shabýyl jasaýmen teńestirilip, qylmystyq jaýapkershilik kúsheıtilýi tıis ekenin aıtaqan bolatyn.  

– Qazaqstanda basqa eshbir mamandyq medıtsına qyzmetkerlerindeı jıi agressııaǵa tap bolmaıdy. Onyń saldary qazirdiń ózinde baıqalyp jatyr. Dárigerler jumystan ketip jatyr, óıtkeni ózin qaýipsiz sezinbeıdi. Sondyqtan biz, buǵan deıin úsh ret Qylmystyq kodekske ózgerister usyndyq. Dárigerge shabýyl jasaǵan adamǵa qatysty bólek bap, qatań jaza bolýy kerek. Bul jaza polıtsııaǵa nemese ormanshyǵa shabýyl jasaýmen teń bolýy tıis. Eger dáriger sonyń kesirinen jumysqa jaramaı qalsa, kináli adam moraldyq ta, materıaldyq ta ótemaqy tóleýi kerek. Qajet bolsa ómir boıy tólesin, - deıdi depýtat.