Medıtsına qyzmetkerlerine «Kásibi boıynsha úzdik» ataǵy berilmek

ASTANA. KAZINFORM – Medıtsına qyzmetkerlerine «Kásibi boıynsha úzdik» ataǵy berilmek. Densaýlyq saqtaý mınıstrliginiń atalǵan ataqty berýge qatysty ereje jobasy Ashyq NQA portalynda jarııalandy.

Ataq densaýlyq saqtaý salasyndaǵy úzdik jetistikteri úshin medıtsına qyzmetkerlerine olardy yntalandyrý jáne qoldaý maqsatynda beriledi. Medıtsına qyzmetkerleri ataqty kelesi nomınatsııalar boıynsha alady:

- «Úzdik statsıonar dárigeri»,

- «Úzdik alǵashqy medıtsınalyq-sanıtarlyq kómek dárigeri»,

- «Úzdik jedel járdem dárigeri»,

- «Úzdik aýyl dárigeri»,

- «Úzdik provızor»,

- «Úzdik densaýlyq saqtaý menedjeri»,

- «Úzdik medıtsınalyq joǵary oqý orny oqytýshysy»,

- «Úzdik sanıtarlyq-epıdemıologııalyq beıindegi dáriger»,

- «Úzdik sanıtarlyq-epıdemıologııalyq saraptama mamany»,

- «Úzdik densaýlyq saqtaýdaǵy áleýmettik qyzmetker»,

- «Úzdik medıtsına kolledji oqytýshysy»,

- «Úzdik densaýlyq saqtaýdaǵy ǵalym»,

- «Úzdik statsıonar meıirgeri»,

- «Úzdik alǵashqy medıtsınalyq-sanıtarlyq kómek meıirgeri»,

- «Úzdik aýyl meıirgeri»,

- «Úzdik akýsher»,

- «Úzdik feldsher».

Medıtsına qyzmetkerine sol nomınatsııadaǵy ataq 10 jyl ishinde bir retten artyq berilmeıdi.

«Kásibi boıynsha úzdik» ataǵyn berý konkýrsyna qujattardy tapsyrý sátinde mynadaı talaptarǵa sáıkes keletin qyzmetkerler qatysa alady:

1) keminde 10 jyl praktıkalyq jumys ótili bar dárigerler, feldsherler, akýsherler, meıirgerler;

2) keminde 10 jyl praktıkalyq jumys ótili bar densaýlyq saqtaýdaǵy áleýmettik qyzmetkerler;

3) keminde 7 jyl praktıkalyq jumys ótili bar menedjerler, provızorlar;

4) praktıkalyq jumys ótili keminde 7 jyl sanıtarııalyq-epıdemıologııalyq beıindegi dárigerler men mamandar;

5) pedagogıkalyq/ǵylymı jumys ótili keminde 7 jyl medıtsınalyq joǵary oqý oryndarynyń, ǴZI, ǴO jáne kolledjderdiń oqytýshylary men ǵylymı qyzmetkerleri.

Ereje tártibimen myna silteme arqyly tanysa alasyzdar.