Medıtsına qyzmetkerlerine qandaı qoldaý kórsetilip otyr
ASTANA. KAZINFORM — Qazaqstanda medıtsına qyzmetkerleriniń mártebesi men áleýmettik jaǵdaıyn arttyrý boıynsha sharalar keshenin iske asyrý jalǵasyp jatyr.
Densaýlyq saqtaý mınıstrligi mamandardy, onyń ishinde aýyldyq jerlerde jumys isteýge kelgen jas kadrlardy qoldaýǵa baǵyttalǵan birqatar bastamany engizdi.
Aýyldyq eldi mekenderde eńbek jolyn bastaǵan jas mamandar kóterme járdemaqy, turǵyn úıge jeńildikti kredıtter, jalaqyǵa qosymsha tólemder jáne áleýmettik qoldaýdyń basqa da túrlerin alady.
2024 jylǵy 1 qańtardan bastap turǵyn úı satyp alýǵa nemese salýǵa bıýdjettik kredıt mólsheri ulǵaıtyldy: aýdan ortalyqtaryna kelgen mamandar úshin 2 500 AEK (9,2 mln teńge) jáne aýyldyq eldi mekenderdi tańdaǵan dárigerler úshin – 2 000 AEK (7,3 mln teńge).
Aýyldyq jerge keminde bes jyl merzimge kelgen medıtsına qyzmetkerlerine 100 eselengen ETJ (8,5 mln teńge) mólsherinde birjolǵy aqshalaı tólem engizildi. Mundaı qoldaýdy 2024 jyly 254 maman, 2025 jyly 106 maman aldy. Qosymsha aılyq eseptik kórsetkishtiń 100 eselengen mólsherinde kóterme járdemaqy beriledi.
Respýblıka boıynsha 2022-2024 jyldar aralyǵynda áleýmettik qoldaýdyń túrli sharalarymen barlyǵy 2 643 medıtsına qyzmetkeri qamtyldy. Onyń ishinde 1 470 maman járdemaqy jáne kóterme tólemder aldy, 977 turǵyn úımen qamtamasyz etildi, 196 kommýnaldyq shyǵystardy óteýdi, jalaqyǵa qosymsha aqyny, oqytýdy jáne baılanys aqysyn tóleýdi qosa alǵanda, qoldaýdyń ózge de túrlerin aldy. Qarjylandyrý respýblıkalyq jáne jergilikti bıýdjetter, sondaı-aq medıtsınalyq uıymdardyń bıýdjetteri esebinen júzege asyryldy.
Usynylǵan qoldaý kólemi boıynsha Soltústik Qazaqstan oblysy (440 qyzmetker), Qostanaı oblysy (295) jáne Pavlodar oblysy (267) kóshbasshy boldy. SQO kóterme tólemder (177), turǵyn úımen qamtamasyz etý (89) jáne qomaqty qosymsha tólemder (121) boıynsha joǵary kórsetkishterdi qosa alǵanda, qamtý kólemi boıynsha absolıýtti kóshbasshylyqty kórsetedi. Qostanaı oblysy turǵyn úımen qamtamasyz etý (85) jáne kóterme tólemder (78) boıynsha myqty pozıtsııalarǵa ıe, bul rette qarjylandyrýdyń edáýir bóligi jergilikti bıýdjetten túsedi. Pavlodar oblysy jergilikti bıliktiń qoldaýǵa (112 qyzmetker) jáne júıeli turǵyn úımen qamtamasyz etýge (58 maman) aıtarlyqtaı qatysýymen erekshelenedi. Bul óńirler kóp arnaly qamtýdy qamtamasyz etti jáne medıtsınalyq kadrlardy tartý men ustap qalýdyń turaqty tásilderin kórsetedi.
Kásiptiń bedelin arttyrý úshin jyl saıyn 1000 AEK birjolǵy tólemmen «Qazaqstannyń eńbek sińirgen dárigeri» qurmetti ataǵy beriledi, sondaı-aq «Mamandyǵy boıynsha úzdik» respýblıkalyq konkýrsynyń jeńimpazdaryna 500 AEK mólsherinde yntalandyrý tólemi kózdelgen. 2024 jyly bul ataqqa 16 maman, 2025 jyly – 17 maman ıe boldy.
Densaýlyq saqtaý qyzmetkerlerine arnalǵan áleýmettik paket sondaı-aq mektepke deıingi uıymdardaǵy balalarǵa arnalǵan oryndardy basymdyqpen berýdi jáne qyzmettik mindetterin atqarý kezinde qaza tapqan nemese múgedek bolǵan medıtsına qyzmetkerleriniń balalary úshin JOO-ǵa konkýrstan tys túsý múmkindigin, sondaı-aq kólik shyǵystaryn óteýdi qamtıdy.
2023-2027 jyldarǵa arnalǵan kóshi-qon saıasatynyń tujyrymdamasy sheńberinde qonys aýdarýshylar úshin turǵyn úı qunynyń 50% mólsherinde qarjylyq kómek alýǵa quqyǵy bar ekonomıkalyq utqyrlyq sertıfıkattary, sondaı-aq «Jastar praktıkasy» jobasynyń sheńberinde jas mamandardyń jalaqysyna qosymsha ústemeaqylar kózdelgen.
Budan basqa, Memleket basshysynyń tapsyrmasy boıynsha Densaýlyq saqtaý mınıstrligi oblystardyń ákimdikterimen jáne Otbasy bankimen birlesip, 2026 jyly kadr tapshylyǵy barynsha qatty seziletin óńirlerde asa tapshy mamandyqtar dárigerlerin turǵyn úımen qamtamasyz etýdi josparlap otyr.
Aıta ketelik dárigerlerge qosymsha 1 mln 700 myń teńgege deıin tólem berilýi múmkin ekeni týraly jazǵan edik.