Medıtsına qyzmetkerlerin qorǵaýdyń keshendi júıesi qalyptastyrylady
ASTANA. KAZINFORM — Dárigerlerdiń kásiptik mindetterin júzege asyrý kezinde ómiri men densaýlyǵyn saqtandyrý tetikteri jetildiriledi.
Densaýlyq saqtaý mınıstriniń tıisti buıryq jobasy ashyq normatıvtik-quqyqtyq aktiler portalynda jarııalandy.
Qujat medıtsına qyzmetkerleriniń kásiptik jaýapkershiligin, sondaı-aq kásiptik mindetterin júzege asyrý kezinde medıtsına qyzmetkerleriniń ómiri men densaýlyǵyn saqtandyrý tetikterin jetildirýge, olardyń áleýmettik jáne quqyqtyq qorǵalý deńgeıin arttyrýǵa baǵyttalǵan.
Buıryq jobasynda medıtsına qyzmetkerleriniń kásiptik mindetterin júzege asyrý kezinde:
— olardyń ómiri men densaýlyǵyn birlesip saqtandyrýdyń úlgilik shartyn engizý;
— kásiptik jaýapkershilikti saqtandyrý aıasynda saqtandyrý qorǵanysyn ıntern-dárigerler men rezıdent-dárigerlerge oqý kezeńinde qoldaný;
— medıtsına qyzmetkerleriniń kásiptik jaýapkershiligin birlesip saqtandyrý sharttaryn jasasý, ózgertý jáne oryndaý tártibin jetildirý;
— medıtsına qyzmetkeriniń kásibı mindetterin oryndaý kezinde úshinshi tulǵalardyń zorlyq-zombylyq áreketteri nátıjesinde onyń ómiri men densaýlyǵyna zııan keltirilgen jaǵdaıda saqtandyrý tólemin júzege asyrý tártibin aıqyndaý;
— saqtandyrý tólemderin júzege asyrý jáne densaýlyq saqtaý sýbektileri, medıtsına qyzmetkerleri, patsıentter men Biryńǵaı saqtandyrý (qaıta saqtandyrý) pýlynyń ákimshisi arasyndaǵy ózara is-qımyl tártibin jetildirý qaǵdılaryn naqtylaý kózdeledi.
— Jobanyń maqsaty — patsıentterdi, medıtsınalyq uıymdardy jáne medıtsına qyzmetkerlerin saqtandyrý arqyly qorǵaýdyń keshendi júıesin qalyptastyrý. Kútiletin nátıjeler — kásiptik jaýapkershilikti saqtandyrý tetikterin jetildirý, medıtsına qyzmetkerleriniń, onyń ishinde dáriger-ınternder men dáriger-rezıdentterdiń ómiri men densaýlyǵyn saqtandyrý arqyly qorǵaýdy keńeıtý, sondaı-aq saqtandyrý júıesine qatysýshylardyń ózara is-qımylynyń tıimdiligin arttyrý, — delingen qujatta.
Buǵan deıin elimizde dárigerlerge arnalǵan ana sútimen qorektendirý jónindegi oqý quraly jańartylǵanyn jazǵan edik.
