Medıneden Almatyǵa baǵyt alǵan SCAT ushaǵy Omanda shuǵyl qondy
ASTANA. KAZINFORM — Medıneden (Saýd Arabııasy) Almatyǵa baǵyt alǵan SCAT áýe kompanııasynyń ushaǵy jolaýshylardyń biriniń densaýlyǵy kúrt nasharlaýyna baılanysty Omandaǵy áýejaıǵa májbúrli túrde qondy.
Oqıǵa týraly aqparatty áýe tasymaldaýshy kompanııanyń baspasóz qyzmeti rastady.
— Medıne — Almaty baǵyty boıynsha reıs oryndaý kezinde jolaýshylardyń biriniń densaýlyǵy nasharlady. Bortta oǵan qajetti kómek kórsetildi. Alaıda ári qaraı medıtsınalyq baqylaý qajet bolǵandyqtan, áýe kemesiniń komandıri Omandaǵy qosalqy áýejaıǵa qoný týraly sheshim qabyldady. Ushaq qonǵannan keıin jolaýshy medıtsınalyq qyzmet mamandaryna tapsyryldy. Jolaýshylardyń qaýipsizdigi, ómiri men densaýlyǵyn saqtaý — áýe kompanııasy úshin negizgi basymdyq, — dedi SCAT áýe kompanııasynyń ókili Vıktorııa Starojılova resmı saýalǵa bergen jaýabynda.
Ushaq Oman astanasy Maskat qalasyna qonǵan. Jolaýshy dárigerlerge tapsyrylyp, em qabyldaý úshin sol elde qalǵan. Onyń qazirgi jaǵdaıy týraly aqparat jarııalanbady.
Qajetti medıtsınalyq kómek kórsetilgennen keıin áýe kemesi qalǵan jolaýshylarmen birge saparyn jalǵastyryp, Almaty áýejaıyna sátti qondy.
Eske sala keteıik, buǵan deıin Almaty — Shymkent baǵytyndaǵy SCAT áýe kompanııasynyń reısi aýa raıynyń kúrt nasharlaýyna baılanysty mejeli jerge qona almaı, ekıpaj Taraz qalasyndaǵy qosalqy áýejaıǵa qoný týraly sheshim qabyldaǵan bolatyn.
