Medınedegi eń úlken meshit úsh ese úlkeıtiledi
ASTANA. 26 qyrkúıek. QazAqparat - SaýdArabııasynyń koroli Abdýlla Medınedegi ál-Masjıd ál-Nabaýı meshitin keńeıtý jobasyn bastaýǵa buıryq berdi. Bul týraly saýdtyq SPA aqparat agenttigine silteme jasaı otyryp, Lenta.rý habarlaıdy.
Keńeıtý nátıjesinde meshit 1,6 mıllıon adamdy qabaldaı alady, ıaǵnı 3 esege jýyq úlkeıedi dep josparlanýda.
Jumystar qansha ýaqytqa sozylatyny jáne qansha qarajat jumsalatyny ázirge belgisiz, alaıda meshit aınalasyndaǵy jerdi satyp alýdyń ózine 6,6 mlrd. dollar ketedi dep eseptelip otyr. «Ál-Arabııanyń» málimdeýinshe, joba úsh kezeń boıynsha júrgiziledi. Aldyn ala málimet boıynsha, birinshi kezeńnen keıin meshitke 800 myń adam syıady, al ekinshi jáne úshinshi kezeńderden soń, taǵy da osynsha adam syıatyndaı bolady dep josparlanýda.
Ál-Masjıd ál-Nabaýı meshiti Islamda Mekkedegi Masjıd ál-Haram meshitinen keıingi ekinshi qasıetti meshit dep sanalady. Bul meshittiń negizi Muhammed (s.ǵ.s.) paıǵambardyń kezinde, naqtyraq aıtsaq, 622 jyly qalaǵan. Sodan beri meshit aýmaǵy birneshe ret keńeıtilgen, qazir ol 400 myń sharshy metr jerdi alyp jatyr. Meshittiń aýmaǵynda Muhammed (s.ǵ.s.) paıǵambardyń zıraty bar.
Osy jyldyń basynda Saýd Arabııasy Qaǵba ornalasqan Masjıd ál-Haram meshitin keńeıtýdi qolǵa alǵan bolatyn. Bul jobanyń quny 21,33 mlrd. dollar boldy. Osy jobadan keıin meshittiń syıymdylyǵy 1,5 mln. adamǵa deıin jetýi tıis.
