Medıtsınalyq JOO-larǵa túsetin talapkerler úshin psıhometrııalyq emtıhan tapsyrý joıyla ma

ASTANA. QazAqparat – Medıtsınalyq joǵary oqý orynjaryna túsetin talapkerler úshin psıhometrııalyq emtıhan tapsyrý qajettiligi joıyla ma? Májilis depýtattarynyń dál osy saýalyna Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenova jaýap berdi, dep habarlaıdy QazAqparat tilshisi.

«Medıtsınalyq mamandyqtar boıynsha psıhometrııalyq emtıhan tapsyrý rásimi «Joǵary jáne joǵary oqý ornynan keıingi bilimniń bilim berý baǵdarlamalaryn iske asyratyn bilim berý uıymdaryna oqýǵa qabyldaýdyń úlgilik qaǵıdalaryn bekitý týraly» Qazaqstan Respýblıkasy Bilim jáne ǵylym mınıstriniń 2018 jylǵy 31 qazandaǵy № 600 buıryǵymen reglamentteledi», - dedi Tamara Dúısenova jaýabynda.

Onyń atap ótýinshe, psıhometrııalyq emtıhannyń negizgi maqsaty – analıtıkalyq qabiletterin, tez áreket etý jáne máselelerdi sheshý qabiletin baǵalaý.

«Búgingi tańda ýnıversıtetterdiń akademııalyq saıasatyna sáıkes talapkerlerdiń óz qalaýy boıynsha ony onlaın jáne oflaın formatta tapsyrýǵa múmkindigi bar. Bolashaq medıtsına qyzmetkeri retinde talapkerdiń jeke basynyń moraldyq-etıkalyq jáne jeke psıhologııalyq qasıetterin baǵalaý maqsatynda psıhometrııalyq emtıhan tapsyrý rásimi oryndy dep paıymdaımyz», - dedi mınıstr.