Medıtsınalyq joǵary oqý oryndaryn qarjylandyrý kólemin ósirý kerek - Islam Suńqar
«Osy depýtattyq saýal arqyly Úkimettiń nazaryn medıtsına kadrlaryn daıarlaý isine aýdaramyz. Búginde medıtsına kadrlarynyń deńgeıi medıtsınalyq bilimniń sapasyna tikeleı baılanysty. Qazirgi kezde medıtsınalyq mamandyqty meńgerýge bólingen memlekettik tapsyrys kólemi memlekettik medıtsınalyq joǵary oqý oryndarynyń oqý úderisin uıymdastyrý shyǵynyn da ótemeıdi. Barlyq medıtsına stýdentteriniń 70 paıyzdan astamy oqıtyn «Jalpy medıtsına» mamandyǵy boıynsha bakalavrıat grantynyń quny sońǵy ret 2021 jyly qaıta qaraldy jáne 1 mln teńge boldy. Aıta ketý kerek, osy soma 2021-2022 jáne 2022-2023 oqý jyldarynda oqýǵa túsken stýdentterge qoldanyldy jáne joǵary oqý oryndarynyń shyǵynyn jappaıdy. Sebebi, bir stýdentke beriletin bilimniń ózindik quny 2 mln teńge bolyp otyr», - dedi I. Suńqar Májilistiń jalpy otyrysynda Úkimet basshysynyń orynbasary Altaı Kólginovtyń atyna joldaǵan saýalynda.
Osy oraıda, ol dárigerdi oqytý zańgerdi nemese ekonomısti oqytqanǵa qaraǵanda áldeqaıda qymbatqa túsetinin aıtty. Oqý synyptary men ádebıetterden bólek, teorııalyq jáne praktıkalyq turǵyda damytý úshin ǵylymı, klınıkalyq ári farmatsevtıkalyq zerthanalar, klınıkalyq bazalar, qymbat modeldeý, medıtsınalyq jabdyqtar jáne basqasy qajet.
Onyń aıtýynsha, memlekettik joǵary medıtsınalyq bilim berý uıymdarynda eskirgen negizgi materıaldyq-tehnıkalyq bazanyń jáne jataqhanalardyń talapqa saı emes ekeni baıqalyp otyr. Shet elderde medıtsınalyq mamandyqtyń oqý aqysy basqa mamandyqtardyń oqý qunynan 2-4 esege deıin joǵary.
«Máseleniń mańyzyn eskere otyryp, medıtsına mamandaryn oqytýda memlekettik bilim berý tapsyrysy boıynsha respýblıkalyq bıýdjetten bólinetin grant qunyn ulǵaıtýǵa basymdyq berý boıynsha shara qabyldaýdy usynamyz», - dedi depýtat.
