Medıtsınalyq joǵary oqý oryndary bilim berýdiń memlekettik baǵdarlamasymen qatar, «Salamatty Qazaqstan» memlekettik baǵdarlamasyna sáıkes damıdy - B. Jumaǵulov
ATY. 22 sáýir. QazAqparat /Názıra Eleýhan/ - Medıtsınalyq joǵary oqý oryndary Bilim berýdiń memlekettik baǵdarlamasymen qatar, 2011-2015 jyldarǵa arnalǵan «Salamatty Qazaqstan» memlekettik baǵdarlamasyna sáıkes damıdy.
Bul eki baǵdarlama medıtsınalyq bilim men ǵylymdy jańǵyrtý úshin úlken mindetter júkteıdi. Bul týraly búgin Almatyda S.Asfendııarov atyndaǵy QazUMÝ-de ótken konferentsııada Bilim jáne ǵylym mınıstri Baqytjan Jumaǵulov aıtty.
Mınıstrdiń aıtýynsha, aldaǵy ýaqytta basqarýdyń jáne kadrlar daıarlaý júıesin qarjylandyrýdyń jańa prıntsıpteri engiziledi. «Materıaldyq-tehnıkalyq baza jańartylady, álemdik standarttarǵa sáıkes oqý-klınıkalyq ortalyqtar men laboratorııalar jańa quraldarmen jabdyqtalady. Úzdik sheteldik tájirıbelerdi eskere otyryp, bilim baǵdarlamalary jetiledi. Ǵylym salasyndaǵy mýltıortalyqta júrgiziletin, onyń ishinde álemniń jetekshi ǵylymı ortalyqtarymen birlesken zertteýlerge qoldaý kórsetiledi. Ǵylymı kadrlardy daıarlaý, onyń ishinde magıstratýra men PhD doktorantýra sheńberinde daıarlaý halyqaralyq deńgeıge kóteriledi. Taǵlymdamadan ótý úshin jastar men bolashaǵy bar ǵalymdardy shetelge jiberýge jáne álemge tanymal ǵalymdardy shaqyrýǵa kóp kóńil bólinetin bolady. Bulardyń barlyǵy densaýlyq saqtaýdyń básekege qabiletti kadrlyq áleýetin qalyptastyrýǵa baǵyttalǵan», - dedi B.Jumaǵulov.
Onyń aıtýynsha, bul áleýet medıtsınalyq joǵary oqý oryndarynda, aldymen, kósh basynda turǵan S.Asfendııarov atyndaǵy Qazaq ulttyq medıtsınalyq ýnıversıtetinde jasalatyn bolady. «Sondyqtan, bul ýnıversıtettiń bolashaǵy zor jáne onyń damýyna jan-jaqty qoldaý kórsetemiz», - dep atap ótti ol konferentsııa barysynda.
