Medıtsınalyq zerthanalyq saraptama bir ortalyqtan júrgiziletin bolady
ASTANA. 7 sáýir. QazAqparat/Aınur Kenebaeva/ - Búgin Astanada №4-shi qalalyq emhananyń negizinde qurylǵan Zerthanalyq tehnologııalar ortalyǵynyń tusaýkeseri boldy.
Bul - QR densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» baǵdarlamasy aıasynda qolǵa alynǵan mańyzdy jobalardyń biri.
Bir ortalyqtan basqarylatyn zerthanany ashýdaǵy maqsat - ortalyqtandyrý jolymen zerthanalyq qyzmetti ońtaılandyrý men jetildirý, Astana qalasy turǵyndaryna ambýlatorlyq-emhanalyq deńgeıde sapaly ári ýaqtyly qyzmet kórsetý.
№4-shi emhana Bas dárigeriniń zerthanalyq qyzmet jónindegi orynbasary Janar Súleımenovanyń aıtýynsha, atalmysh jobany júzege asyrý medıtsınalyq mekemelerdegi tolyq kólemde qoldanylmaıtyn jabdyqtardy bir ortalyqqa shoǵyrlandyrý negizinde júrgizildi. Bul óz kezeginde naýqastardy qaraý merzimin aıtarlyqtaı qysqartýǵa, qoldanysy qymbatqa túsetin medıtsınalyq jabdyqtardy tıimdi paıdalanýǵa, shyǵyndardy azaıtyp, eńbek ónimdiligin arttyrýǵa septigin tıgizedi.
Zerthanalyq tehnologııalar ortalyǵynyń iske qosylýy nátıjesinde jedel túrde jáne erekshe jaǵdaılarda qajet etilmeıtin, sonymen qatar halyqtyń qoly jete bermeıtin kúrdeli qan saraptamalary atalmysh ortalyqta jasalatyn bolady. Zerthanaǵa qalalyq emhanalardan kelip túsken qan zerthanalyq aqparattyq júıe negizinde tirkeýge alynady. Al jıi taǵaıyndalatyn, qorytyndysy dárigerge shuǵyl túrde qajet, jalpy klınıkalyq jáne jedel jasalatyn zertteýler alǵashqy medıtsınalyq-sanıtarlyq kómek kórsetý mekemeleri janyndaǵy jergilikti zerthanalarda júrgiziledi.
Astana qalasy densaýlyq saqtaý basqarmasynyń bastyǵy Dáýlethan Esimovtiń málimdeýinshe, qazirgi tańda Astana qalasy dansaýlyq saqtaý basqarmasynyń júıesinde ambýlatorlyq-emhanalyq jáne statsıonarlyq deńgeıdegi 29 klınıka-dıagnostıkalyq zerthana bar. Qalalyq emhanalardaǵy laboratorııalyq qurylǵylardyń jalpy sany - 465 dana. Medıtsınalyq mekemelerde jumys isteıtin dáriger-laboranttardyń sany - 101, orta medıtsınalyq bilimi bar laboranttardyń sany - 174, degenmen zerthana mamandarynyń tapshylyǵy búgingi kúni 37,3 %-dy qurap otyr.
Dáýlethan Esimovtiń pikirinshe, ortalyqtandyrylǵan zerthana qurý zerthanalyq qyzmet salasynda ózekti bolyp otyrǵan maman-kadrlar jetispeýshiligi máselesin sheshýdiń bir joly bolyp tabylady.
Byltyrǵy jyly jalpy sany 500 myńǵa tarta bıohımııalyq zertteýler jasalǵan bolsa, jańa ortalyq negizinde saraptama kólemi 1 mln-ǵa deıin ulǵaımaq.
