Medıtsınalyq uıymdardy akkredıtteýdi endi kvazımemlekettik sektor baqylaıdy

ASTANA. QazAqparat - 2018 jyldan bastap medıtsınalyq uıymdardy akkredıtteý qyzmeti memlekettik organnan (Qoǵamdyq densaýlyq saqtaý komıteti) kvazımemlekettik sektorǵa, ıaǵnı Densaýlyq saqtaýdy damytý respýblıkalyq ortalyǵyna (DSDRO) berildi, dep habarlaıdy QazAqparat.

«2017 jyldyń 14 jeltoqsanynda QR DSM Medıtsınalyq qyzmet sapasy jónindegi birikken komıssııasy DSDRO-ny akkredıtteýshi organ retinde tirkeý týraly sheshim jasady. Osynyń negizinde, 2018 jyldyń 23 qańtarynda DSDRO-ny akkredıtteý týraly (bes jyl merzimge) kýálik shyǵaryldy», - dep atap ótilgen ortalyqtyń habarlamasynda.

Belgili bolǵandaı, qazirgi ýaqytta Qazaqstanda 592 uıym akkredıtteldi, bul jalpy medıtsınalyq uıymnyń 11 paıyzyn quraıdy.  Akkredıttelgen uıymdardyń negizgi bóligi, ıaǵnı 444-i (75%) memlekettik uıymdarǵa tıesili, al 148-i (25%)  -jekemenshik uıymdar.

Akkredıttelgen uıymdar sanynyń tómen bolýy jaǵdaıyna toqtalsaq,  2018 jylǵa deıin akkredıtteý qyzmeti aqysyz memlekettik qyzmet retinde júrgizildi. Bul turǵyda respýblıkalyq bıýdjetten jylyna 180 uıymdy akkredıtteıtin shekteýli qarajat bólinip keldi. Qyzmettiń tabystalýyna baılanysty, 2018 jyldan bastap akkredıttelýge tıis uıymdar sany shektelmeıdi ári tirkeý qyzmeti densaýlyq saqtaý uıymdarynyń qarajaty esebinen jáne basqa tyıym salynbaǵan kózder esebinen júrgiziledi.

«Akkredıtteýge ótinimder Densaýlyq saqtaý mınıstriniń  №127 buıryǵynyń talaptaryna sáıkes qabyldanady. 2018 jyly ótinimder qabyldaý úderisi avtomattandyrylady. Medıtsınalyq uıymdardyń akkredıtteýge qatysýy sapaly jáne qaýipsiz medıtsınalyq kómek negizinde medıtsınalyq qyzmet kórsetý naryǵynda  básekelestik týdyrýǵa múmkindik beredi. Akkredıtttelgen medıtsınalyq uıymdardyń kepildendirilgen medıtsınalyq kómek kólemi aıasynda, onyń ishinde áleýmettik medıtsınalyq saqtandyrý júıesinde qyzmet kórsetýge memlekettik tapsyrys alýǵa aıryqsha quqyǵy bolady», - delingen DSDRO málimetinde.