Medıtsınalyq uıymdarda tegin dárilerdiń bar-joǵyn qalaı bilýge bolady

ASTANA. QazAqparat - Dıspanserlik patsıentter tegin beriletin dári-dármekterdiń dárihanalarda bar-joǵyn, olardyń qashan jetkiziletinin, memlekettik satyp alýdyń júrgizilgenin, ne júrgizilmegenin endigide onlaın rejimde kórip otyra alady, dep habarlaıdy QazAqparat QR Densaýlyq saqtaý mınıstrligine silteme jasap.

Málim etilgendeı, onlaın rejimdegi aqparatty Biryńǵaı dıstrıbıýtor saıtynyń «2018 jylǵa ADQ boıynsha aqparat» bóliminen myna silteme boıynsha: https://www.sk-pharmacy.kz/rus/press-centr/zakup_ls_i_imn_na_2018_god_rus/ tabýǵa bolady.

«SQ-Farmatsııa» saıtynyń arnaıy qurylǵan bóliminde patsıentter biryńǵaı dıstrıbýtsııa júıesi arqyly dári-dármekti satyp alý jaǵdaıy týraly jáne dári-dármekti tegin retsept boıynsha bosatatyn dárihana uıymdarynda onyń bar-joǵyna qatysty barlyq aqpartty taba alady.

«Naýqastar úshin ózderiniń aımaǵynda qajetti dári-dármekterdiń bar-joǵyn jáne onyń dárihanaǵa kelgen-kelmegenin bilý qanshalyqty mańyzdy ekenin túsinemiz. Sondyqtan, bul derekterdi ashyq jarııalaý týraly sheshim qabyldandy», - deıdi Biryńǵaı dıstrıbıýtordyń Basqarma tóraǵasynyń  mindetin atqarýshy Sharııa Ismýhanova.

Sonymen qatar kórsetilgen shuǵyl baılanys telefondaryna qońyraý shalý arqyly qajetti preparattyń belgili bir óńirge qashan jóneltiletini týraly aqparatty alýǵa bolady.