Medıtsınalyq-sanıtarııalyq alǵashqy kómek uıymdarynda qaǵaz júzinde esep júrgizilýi joıyldy

ASTANA. QazAqparat - 2015 jylǵy 1 sáýirinen barlyq memlekettik medıtsınalyq-sanıtarııalyq alǵashqy kómek kórsetetin uıymdarynda eseptik qujattamadaǵy 4 qujat boıynsha qaǵaz júzinde esep júrgizilýi joıyldy. Bul týraly QR Densaýlyq saqtaý jáne áleýmettik damý mınıstrliginen habarlandy.

Osy oraıda medıtsına qyzmetkerleriniń avtomattandyrylǵan jumys oryndary bar medıtsınalyq uıymdarynda tómendegi qujattardyń elektrondyq túrde engizilýi qarastyrylǵan:

- «Dárigerlerdi úıge shaqyrtýdy jazý kitaby» 031/e qujaty;

- «Emhanada (ambýlatorııada), dıspanserde, konsýltatsııada jáne úıde naýqastardy qaraýdy esepke alý tizimdemesi» 039/e qujaty;

- «Medıtsınalyq uıymdarǵa tirkeý talony» 057/e qujaty;

- «Ambýlatorııalyq naýqastardy tirkeý jýrnaly» 278/e qujaty.

Osyǵan baılanysty, joǵaryda kórsetilgen qujattardy qaǵaz júzinde qolmen toltyrý qajet emes. Kompıýterlerlik tehnıkamen jabdyqtalýy eskerilip, 2016 jylǵy 1 qańtardan bastap qalalyq ambýlatorııalyq-emhanalyq uıymdarda bastapqy esep qaǵazdaryn tolyǵymen elektrondyq qujataınalymyna kóshirý josparlanýda.

Aýyldyq ambýlatorııalyq-emhanalyq uıymdar bastapqy esep nysandaryn elektrondyq túrde júrgizilýine 2017 jylǵy 1 qańtar aıynan bastap kóshedi.

Elektrondyq qujat aınalymyna ótý úrdisi qosymsha qarjyny qajet etpeıdi, biraq medıtsınalyq uıymdardy kompıýterlik tehnıkamen qamtamasyz etý úshin qarajat kerek. Elektrondyq qujat aınalymyna kóshý eseptik qujattamany júrgizýde medıtsına qyzmetkerleriniń júktemesin azaıtýǵa jáne olarǵa emdelýshilerdi qabyldaý men qaraý úshin kóbirek ýaqyt bólýge múmkindik beredi.