Medıtsınalyq saqtandyrýda jarna tóleý jarty jylǵa shegeriledi
ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat.
QR zań jobasyn tanystyrý barysyndaǵy Densaýlyq saqtaý jáne áleýmettik damý mınıstri Tamara Dúısenovanyń sózine qaraǵanda, engizilip otyrǵan ózgeristerge sáıkes bekitilgen merzim jarty jylǵa shegerilýde. Osy rette jumys berýshiler, jeke kásipkerler, jeke notarıýstardyń, jeke sot oryndaýshylardyń, advokattardyń, jeke tulǵalardyń aýdarymdary men jarnalaryn tóleý merzimi 2017 jyldyń 1 qańtarynan emes, 1 shildesinen iske asyryla bastaıdy. Sonymen qatar memleket halyqtyń belsendi emes bóligi úshin jarnany jarty jylǵa keıin tóleıdi, ıaǵnı 2018 jyldyń 1 qańtarynan bastap tólem jasaıdy.
Ekinshiden, tólemder men jarnalardyń júıege túsý merzimi alty aıǵa shegerilgendikten, sáıkesinshe, júıede kórsetiletin medıtsınalyq kómekke aqy tóleý jarty jylǵa uzartylady (2018 jyldyń 1 qańtarynan bastap).
Budan buryn habarlanǵandaı, osy merzimde qor men onyń fılıaldary qurylady, densaýlyq saqtaý shyǵyndary respýblıkalyq deńgeıde shoǵyrlanady. Bul turǵyda Qor medıtsınalyq qyzmetterdiń biryńǵaı strategııalyq satyp alýshysy retinde qyzmet etedi. Mınıstrdiń aıtýynsha, atalǵan merzimdi uzartýǵa bıýdjettik zańnamadaǵy ózgerister yqpal etti.
«Merzimderdi ózgertýdiń negizi Úkimettiń 2017-2019 jyldarǵa arnalǵan bıýdjetti qalyptastyrý kezinde bıýdjetaralyq qatynastar ustanymdaryn qaıta qaralýynda bolyp otyr»,-dep toqtaldy T. Dúısenova.
