Medıtsınalyq saqtandyrýda jarna tóleý merzimi jarty jylǵa shegerildi
«Elbasynyń tapsyrmasy boıynsha 2017 jyldan bastap elimizde Mindetti áleýmettik medıtsınalyq saqtandyrý júıesi engizilip otyr. «100 naqty qadam» Ult josparynyń 80-shi qadamyn júzege asyrý barysynda ótken jyldyń qarashasynda «Mindetti áleýmettik medıtsınalyq saqtandyrý týraly» Zań qabyldandy. Onda medıtsınalyq saqtandyrý júıesin qalyptastyrý normalary kózdelgen. Bıylǵy jyly júıeni júzege asyrýyn tereńdetý maqsatynda mınıstrlik tarapynan 6 kodekske jáne 15 zańǵa túzetýler kózdeıtin jańa zań jobasy ázirlengen boltyn. Memleket basshysynyń 2016 jylǵy 14 maýsymdaǵy hattamalyq tapsyrmasyn oryndaý maqsatynda jáne Ádilet mınıstrliginiń usynysy boıynsha zań jobasy eki zańnamalyq jobaǵa bólindi», - dedi Densaýlyq saqtaý jáne áleýmettik damý mınıstri Tamara Dúısenova Úkimet otyrysy barysynda jasaǵan baıandamasynda.
Osy rette vedomstvo basshysy Úkimet otyrysynda Mınıstrler kabınetiniń nazaryna «Qazaqstan Respýblıkasynyń kekıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» QR zań jobasyn usyndy.
«Zań jobasy eki máseleni qarastyrylady. Birinshisi, medıtsınalyq saqtandyrý qoryna jarnany tóleý merzimin jarty jylǵa shegerýge baılanysty. Osy rette jumys berýshiler jáne ózin jumyspen qamtyǵan azamattardan jarnalar men tólemder 2017 jyldyń 1 qańtarynan emes, 1 shildesinen iske asyrylady. Sonymen qatar memleket halyqtyń belsendi emes bóligi úshin jarnany jarty jylǵa keıin tóleıdi, ıaǵnı 2018 jyldyń 1 qańtarynan bastap tólem jasaıdy. Sáıkesinshe, medıtsınalyq saqtandyrý júıesiniń medıtsınalyq kómek kórsetý men qordan tólem jasaý da jarty jylǵa keıin bastalady (2018 jyldyń 1 qańtarynan bastap)», - dep naqtylady mınıstr.
Onyń sózine qaraǵanda, osy merzimde qor men onyń fılıaldary qurylady, densaýlyq saqtaý shyǵyndary respýblıkalyq deńgeıde shoǵyrlanady. Bul turǵyda Qor medıtsınalyq qyzmetterdiń biryńǵaı strategııalyq satyp alýshysy retinde qyzmet etedi.
Daýys berý barysynda Úkimet músheleri zań jobasyna engizilip otyrǵan jańashyldyqtardy biraýyzdan qoldady.