Medıtsınalyq saqtandyrý júıesinde yntalandyrý sharalaryn da qarastyramyz - Bahmýtova
ASTANA. QazAqparat - «Áleýmettik medıtsınalyq saqtandyrý qory» AQ basqarma tóraǵasy Elena Baxmýtovanyń aıtýynsha, bolashaqta jańa medıtsınalyq saqtandyrý júıesi aıasynda syıaqy taǵaıyndaý máselesin qarastyrýǵa bolady. Degenmen, aldymen ol júıeni is júzinde qolǵa alý qajet, dep xabarlaıdy QazAqparat tilshisi.
«Iá, jaqynda ǵana senatorlarymyz da áleýmettik medıtsınalyq saqtandyrý júıesi aıasynda syıaqy belgileý máselesin kótergen bolatyn. Árıne, «qamshydan bólek toqash ta» bolsa xalyq belsendiligi arta túsedi. Aldymen ol júıeniń kezeń-kezeńmen engiziletini jaıynda aıtý qajet. Al tarıfter men jarnalar birtindep kóteriledi. Zań boıynsha tólemaqynyń kólemi birden kóterilmeıdi. Júıe tolyǵymen iske qosylǵansha kem degende bes jyl ketedi, ıaǵnı 2022 jylǵa deıin jarnalar birte-birte kóteriledi. Sóıtip, áleýmettik medıtsınalyq saqtandyrý júıesi tolyǵymen iske asyp, xalyq oǵan ábden úırengen kezde yntalandyrý sharalaryn da oılastyrýǵa bolady. Alaıda ol kezdiń ózinde álemdik tájirıbeni, sonyń ishinde Shyǵys Eýropa elderiniń tájirıbesin zerdelep shyǵý qajet», - dedi qor basshysy jýrnalısterge bergen suxbatynda.
Onyń aıtýynsha, áleýmettik medıtsınalyq saqtandyrý júıesi aıasynda 2019 jyldan bastap jumysshylar óz jalaqysynyń 1 paıyzyn qorǵa aýdarady. 2020 jylda atalǵan kórsetkish 2 paıyzǵa deıin kóteriledi. Al jumys berýshilerdiń jarnasy bas kezinde 1 paıyzdy qurasa, 2022 jylǵa qaraı 3 paıyzǵa deıin kóteriledi.
