Medıtsınalyq saqtandyrý qoryna jarnany salý jarty jylǵa shegeriledi
Bul týraly búgin Parlament Májilisinde «Qazaqstan Respýblıkasynyń keıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» QR zań jobasyn tanystyrý barysynda Densaýlyq saqtaý jáne áleýmettik damý mınıstri Tamara Dúısenova málim etti, dep habarlaıdy QazAqparat.
Onyń sózine qaraǵanda, engizilip otyrǵan ózgeristerge sáıkes bekitilgen merzim jarty jylǵa shegerilýde. Osy rette jumys berýshiler jáne ózin jumyspen qamtyǵan azamattardan jarnalar men tólemder 2017 jyldyń 1 qańtarynan emes, 1 shildesinen iske asyrylady. Sonymen qatar memleket halyqtyń belsendi emes bóligi úshin jarnany jarty jylǵa keıin tóleıdi, ıaǵnı 2018 jyldyń 1 qańtarynan bastap tólem jasaıdy. Sáıkesinshe, medıtsınalyq saqtandyrý júıesiniń medıtsınalyq kómek kórsetý men qordan tólem jasaý da jarty jylǵa keıin bastalady (2018 jyldyń 1 qańtarynan bastap).
Onyń sózine qaraǵanda, osy merzimde qor men onyń fılıaldary qurylady, densaýlyq saqtaý shyǵyndary respýblıkalyq deńgeıde shoǵyrlanady. Bul turǵyda Qor medıtsınalyq qyzmetterdiń biryńǵaı strategııalyq satyp alýshysy retinde qyzmet etedi.
Mınıstrdiń aıtýynsha, atalǵan merzimdi uzartýǵa bıýdjettik zańnamadaǵy ózgerister yqpal etti.