Medıtsınalyq saqtandyrý qoryna jarna aýdarýdan Almaty kósh bastap keledi
ALMATY. QazAqparat - Mindetti áleýmettik medıtsınalyq saqtandyrý jarnasyn tóleý jaǵynan Almaty shahary kósh bastap keledi. Búgingi kúnge deıin Medıtsınalyq saqtandyrý qoryna ońtústik astanalyq jumys berýshiler men jeke kásipkerlerden 34,8 mlrd teńge túsken, dep habarlaıdy MSQ Almaty qalalyq fılıaly.
Derekke súıensek, almatylyqtardyń jarnasy jalpy respýblıka boıynsha jınaqtalǵan somanyń besten bir bóligin qurap otyr. Tólemderiń negizgi bóligi nemese 32,3 mlrd teńgesi - jumys berýshilerdiń óz qaramaǵyndaǵy jumyskerler úshin aýdarǵan jarnasy.
«Saqtandyrý júıesine 2017 jyldyń 1 shildesinen bastap qatysa bastaǵan jumys berýshiler jarna tóleýdi belsendi túrde jalǵastyryp keledi. Al 2017 jyldyń ekinshi jarty jyldyǵynda ózi úshin jarna aýdarǵan jeke kásipkerler men azamattyq-quqyqtyq kelisimshart negizinde eńbek etetin tulǵalar 2018-2019 jyldary mindetti tólemnen bosatylǵan bolatyn. Biraq olar jumys berýshi retinde jarna aýdarýǵa mindetti» - delingen habarlamada.
Esterińizge sala ketsek, jınaqtalǵan qarjy Ulttyq bankte saqtalady jáne 2020 jyldan bastap MÁMS paketine kiretin qyzmetter aqysyn tóleýge jumsalmaq. Elimizdiń bas bankimen qarjyny senimgerlik basqarý týraly kelisim bekitilgen.
Búgingi tańda MSQ memlekettik tapsyrys boıynsha kórsetiletin tegin medıtsınalyq kómek paketiniń qarjylyq operatory bolyp tabylady.
