Medıtsınalyq saqtandyrý qoryna túsken jarna 176 mlrd teńgeden asty
NUR-ASTANA. QazAqparat - Mamyr aıynda túsken saqtandyrý jarnasynyń kólemi 9,5 mlrd teńgeden asty. Bul týraly QazAqparat Medıtsınalyq saqtandyrý qorynyń baspasóz qyzmetine silteme jasap habarlaıdy.
«2017 jyldyń 1 shildesinen 2019 jyldyń 31 mamyryna deıingi aralyqta Qorǵa 176,7 mlrd teńge tústi. Aýdarymdar júıe iske qosylǵan alǵashqy jarty jylda ózi úshin jarna tóleýge mindettelgen jeke kásipkerler men azamattyq-quqyqtyq kelisimshart negizinde eńbek etetin tulǵalarǵa, sondaı-aq jumys berýshilerge tıesili. Atap aıtqanda, jınaqtalǵan qarajattyń 95% nemese 167,9 mlrd teńgesin jumys berýshiler, qalǵan 5% jýyǵy nemese 8,8 mlrd teńgeni - jeke kásipkerler men kelisimshart negizinde eńbek etetin sanat aýdarǵan», - delingen baspasóz baıanynda.
Málimetke qaraǵanda, aımaqtyq turǵydan alǵanda, jarna tóleý jaǵynan burynǵysha Almaty, Nur-Sultan qalalary men Qaraǵandy oblysy kósh bastap tur.
Esterińizge sala ketsek, jınaqtalǵan qarjy Ulttyq bankte saqtalady jáne 2020 jyldan bastap MÁMS paketinde kórsetiletin medıtsınalyq qyzmetter aqysyn tóleýge jumsalmaq.
